Saassussineq anguniakkatsinnik allannguisitsinngisaannassaaq

Franskit sisamanngornermi 14. julimi inuiattut ullorsiornerminnik Bastillemik Nicemi nalliuttorsiutiginninneranni inuit pisuussuteqanngitsut saassunneqarput. Nunat tamalaat tusagassiortuisa nalunaarutigaat inuit ikinnerpaamik 84-it toqutaasimassangatinneqartut, matumani meeqqat ilanngullugit taakkulu saniatigut amerlasuut ajoqusersimasut napparsimavimmut unitsinneqarsimapput. Toqutaasut ajoqusersimasullu amerlassusii suli qulakkeerlugu ilisimaneqanngillat.

Lastbiili najukkami nalunaaqutaq malillugu nal. 22.45 missaani assiaqut aporlugu inuppassuit katersuussimaffiatigut inuit aqqutalugalugit ingerlasimavoq. Lastbiilimik qaqortumik ingerlatitsisoq franskit isumannaallisaanermik sulisuinit toqunneqarsimavoq. Saassussinermut maannamut akisussaasuunermik nalunaaruteqartoqanngilaq. Peqqarniisaarniat saassussinerat pineqarnersoq franskit oqartussaasuinit suli uppernarsineqanngilaq.

Vittus Qujaukitsup oqaatigaa:

"Tusakkat assilisallu Nicemeertut amiilaarnaqaat. Saassussinerli amiilaarnartoq ataatsimut anguniakkatsinnik sunniuteqanngisaannassaaq naalagaaffiullu aalajangerneranik  allannguinngisaannassalluni."

Kalaallit Nicemiittut kaammattorneqarput, pisariaqartitsivikkunik danskit nunanut allanut ministereqarfiata nunarsuaq tamakkerlugu pigaartoqarfia + 45 33 92 11 12-ikkut / bbb@um.dk.-kkut attaveqarfigeqqullugu.

Paasisaqarnerorusuttoqaruni Nunanut Allanut Pisortaqarfimmi immikkoortortaqarfimmi pisortaq Jacob Isbosethsen, +299 55 67 72-ikkut attaveqarfigineqarsinnaavoq.