Issittup Imartaani aalisarneq pillugu isumaqatiginninniarneq

Ulluni 6 – 8. juli 2016 nunat arlallit akornanni issittup imartaani siunissami aalisalersinnaaneq pillugu pingajussaannik ataatsimiittoqarpoq. Ataatsimiinneq Canada-mit Iqalunni Nunavut-imiittumi ingerlanneqarpoq. Siusinnerusukkut ataatsimiinnerit Washington-mi december 2015 aamma april 2016-mi ingerlanneqarsimapput.

Isumaqatigiissuteqarnissaq pillugu isumaqatiginninniarnerit issittup imartaani issittup imartaani naalagaaffiit issittumut sineriallit tallimaasut akornanni unioqqutitsisumik aalisarnerup pinaveersaartinnissaa pillugu nalunaarummit juli 2015-imeersumit aallaaveqarput. Peqatigitillugu naalagaaffiit peqataasut amerlisinneqarput. Taamaasilluni Iqalunni ataatsimiinnermi peqataapput USA, Canada, Rusland, Norge aamma Kunngeqarfik Danmark Savalimmiut Kalaallillu Nunaat sinnerlugit, EU, Sydkorea, Kina, Japan aamma Island.

Ataatsimiinnermi oqallisigineqartuni sammineqarput Issittup Imavittaani issittup imartaani qitiusumi aqunneqanngitsumik aningaasannanniutigalugu aalisarnerup pinaveersaartinneqarnissaa peqatigitillugulu siunissami aalisagaqatigiiusinnaasunik piujuartitsilluni iluaqutiginnissinnaanerup qulakkeerneqarnissaa, sikup tunuariartornerani taamaattunik takkuttoqassagaluarpat.

Issittup imartaani aqunneqanngitsumik aningaasannanniutigalugu aalisarnerup pinaveersaartinnissaanut iliuusaasinnaagallartunik aalajangiinissamut aallartitat tamarmik ataatsimiinnermi neriorsuutitik uppernarsarpaat. Pineqartumi qulakkeerniarneqarpoq, aningaasannanniutigalugu aalisarnermik aallartitsisoqanngikkallassasoq taamaasiornissamut naammaginartunik ilisimatuussutsikkut tunngavissaqalinnginnermi aammalu nunani aalisarnermik aqutsinermut kattuffimmik isumaqatigiissuteqartoqarsimatinnagu. Aallartitat tamarmik isumaqatigiissutigaat issittup imartaani ataatsimoorussamik pisussaaffeqarnissaq imaani pisuussutinik uumassusilinnik piginniinnarsinnaanerup siuarsarneqarnissaa aamma piujuartitsilluni iluaqutiginnissinnaaneq.

Isumaqatigiissuteqarnissaq pillugu isumaqatiginninniarnerit qularnanngitsumik suliaassapput tulleriaarlugit  ingerlanneqartussat, sumiiffimmut tamatumunnga nunani aalisarnermik aqutsinermut kattuffimmik ataatsimik arlalinnilluunniit pilersitsisoqannginnerani. Atlantikup avannamut kangimut Aalisarneq pillugu kattuffimmit NEAFC-imit sumiiffiup ilamernga oqartussaaffigineqareerpoq. Taamaasilluni pineqanngilaq imartamit eqqissisimatitsinissaq, paarlattuanilli piujuartitsilluni iluaqutiginninnerup qulakkeerneqarnissaa, issittup imartaani siunissami uumasoqassutsikkut aningaasannanniutigalugu aalisarsinnaanissamut tunngaveqalissagaluarpat.

Sumiiffimmi aalisagaqatigeeqarsinnaanera pillugu suli killilimmik ilisimatuussutsikkut ilisimasaqartoqarpoq ataatsimiinnermilu oqallisigineqarput ataatsimoorussamik ilisimatuussutsikkut ilisimatusarnissamut pilersaarut aamma nakkutilliineq kiisalu nunap inoqqaavisa ilisimasaannik atuinissaq. Tullianik ilisimatuussutsikkut workshoppernissaq Tromsø Norge-mi ulluni 26. - 28. september 2016 ingerlanneqassaaq.

Akuusut akornanni tullianik isumaqatiginninniartoqaqqissaaq ukiamut, aasap ingerlanerani piffissaq sumiiffissarlu aalajangerneqassapput.

Iqalunni ataatsimiinnermi Kalaallit Nunaat Aalisarnermut, Piniarnermut Nunalerinermullu Naalakkersuisoqarfimmit aamma Washington-imi Sinniisoqarfimmit sinniisuuffigineqarpoq. Taakku saniatigut Nunanut allanut ministeriaqarfik aamma Savalimmiuni Naalakkersuisunut sinniisoq peqataapput.

Ataatsimiinneq USA-mit siulersorneqarpoq, siulittaasup nalunaarutaa una toorlugu saqqummersissinnaavat.

Paasisaqarnerorusuttut attaveqarfigisinnaasaat: Birgitte Jacobsen, Aalisarnermut, Piniarnermut Nunalerinermullu Naalakkersuisoqarfimmeersoq, oqarasuaammut 548901-imut sianerfigalugu, imaluunniit e-mailikkut: bija@nanoq.gl