Illuut A/S

Nuuk illut

Illuut A/S-imi ataasinngorneq 4. juli 2016-imi nalinginnaasumik ataatsimeersuartoqarpoq.

Ingerlatseqatigiiffiup ukiumoortumik nalunaarusiaanik akuersissutiginninneq ilaatigut oqaluuserineqarpoq.

2015-imi 16,8 mio. kruuninik sinneqartoortoqartoq ukiumoortumik nalunaarummi takuneqarsinnaavoq. Ingerlatseqatigiiffiup ukiumi naatsorsuuseriviusumi angusai ataatsimut pitsaasuupput, kisitsisit pingaarnerit tamarmik siuariarfiusimallutik naammaginartumillu inissisimallutik.Illuut A/S-p aningaasaqarnera patajaatsuuvoq, ingerlatseqatigiiffiup pisussaaffini qajannaatsumik tunngaveqarluni ingerlassinnaasimallugit.

Illuut A/S-imi ileqqoreqqusanik allanngortitsineq

Aningaasaqarnermut Akileraartarnermullu Ataatsimiititaliamit akuerineqareerluni 09. juni 2016-imi immikkut ittumik ataatsimeersuartoqareerneratigut ingerlatseqatigiiffimmi ileqqoreqqusat allanngortinneqarput. Ileqqoreqqusanik allannguinerup kingunerissavaa Illuut A/S siunissami siulersuisoqartalissasoq qullersaqarfeqarlunilu Namminersorlutik Oqartussani atorfilittanik qitiusumik allaffeqarfianeersuunngitsunik. Immikkut ittumik ataatsimeersuarnermi tunuarput Naalakkersuisoqarfimi pisortaq Olafur P. Nielsen, Naalakkersuisoqarfimmi pisortaq Søren Hald Møller aamma Naalakkersuisoqarfimmi pisortaq Nikolai S. Christensen, siulersuisunngortullu tassaallutik Jukku Mølgaard, Inge Bisgaard aamma Birte Flæng Møller. Jukku Mølgaard Naalakkersuisunit Illuut A/S-imi siulersuisut siulittaasortaavattut toqqarneqarpoq.

Siulersuisut nutaat suliassaat siulleq tassaalerpoq ingerlatseqatigiiffimmi qullersaqarfimmik toqqaanissaq, namminersorlutik oqartussat allaffeqarfiannut attuumassuteqanngitsumik.

Attaveqarfissaq Lars Balslev, immikkoortortaqarfiup pisortaa, Siulersuisunut Allattoqarfik, oqarasuaat 34 51 27