Tasiilami ilaqutariinnik katsorsaasarfimmut aningaasaliissutit

Naalakkersuisut qulakkeerpaat Tasiilami ilaqutariinnik katsorsaasarfissamut il. il. 2016-imi 2,5 mio. koruuninik immikkut aningaasaliissutissanik atugassanngortitsisoqassasoq. Aningaasaliissutit maannakkut Tasiilami illut pigineqareersut sivikitsumik iluarsaanneqarsinnaanersut ilaqutariinnillu katsorsaasarnermut qimarnguittalerlugit atorneqarsinnaanersut paasiniaanermut atorneqassapput. Taamatuttaaq aningaasaliissutit illuliassat ataavarnerusumik ilaqutariinnik katsorsaasarfittut qimarnguittullu Tasiilami atorneqarneqarsinnaasut pilersaarusiornerinut atorneqassapput.

Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfik upernaaq Tasiilamut misissuiartorpoq, tassani ilaatigut paasineqarluni meeqqanut tunngassuteqartunik suliat ingerlasut 520-usut. 

Nakkutilliinermik nalunaarusiaq tunngavigalugu Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfiup nakkutilliinermik nalunaarusiami ajornartorsiutitut taakkartorneqartut suliarineqarnerisa nanginnissaat taamatuttaaq najugaqarfinni toqqaannartumik ikiorsiisinnaaneq pillugit Kommuneqarfik Sermersooq oqaloqatigilersimavaa.

Immikkut aningaasaliissutit pillugit Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisup Martha Lund Olsen oqaaseqarpoq. ”Nuannaarutissaavoq 2,5 mio. koruuninik immikkut aningaasaliissutinik pissarsisimagatta, tassami 2016-ip ingerlanerani Tasiilami ilaqutariinnut katsorsaavimmik qimarnguittalimmik pilersitsinissamut periarfissat misissorsinnaanngoratsigit. Taamatuttaaq Kommuneqarfik Sermersooq ajornartorsiutit nakkutilliinermit nalunaarusiami tikkuarneqartut aaqqiiviginissaat pillugu kingunissalimmik oqaloqatigisinnaasimagatsigu nuannaarutigaara.