Tuttutassiissutit umimmattassiissutillu

2016-imi ukiuuneranilu 2017-imi ukiuunerani piffissat piniarfiusussat tuttutassiissutit umimmattassiissutillu

Matumuuna 2016-imi ukiuuneranilu 2017-imi piffissaliussat piniarfiusussat, tuttutassiissutit kiisalu umimmattassiissutit piffissami 13. maj-imiit 2016-imi 17. Juni ilanngullugu tusarniutigineqareerlutik nalunaarutigineqarput.

Tuttut
  • Piniarfinnut tamanut tunngasoq: Inuussutissarsiutigalugu tuttunniarneq 1. augustimi aallartissaaq 15. oktoberi ilanngullugu ingerlassalluni.
  • Piniarfinnut tamanut tunngasoq: Sunngiffimmi tuttunniarneq 1. augustimi aallartissaaq 30. septemberi ilanngullugu ingerlassalluni. Aqutsiveqarfimmi Nuuk-mi sunngiffimmi pinialuttartunut ataasiakkaanut akuersissutinik marlunnik tamarmik tuttunut tallimanut atuuttunik tunniussisoqassaaq. Piniarfik 3-mut akuersissut ataaseq aamma Piniarfik 4-mut akuersissut ataaseq.
  • Piniarfik 2 (Sisimiut-Kangerlussuaq): Ukiuunerani sapaatip akunnerini pingasuni killeqanngitsumik inuussutissarsiutigalugu tuttunniarnissaq.  
  • Piniarfik 1 (Naternaq), Piniarfik 4 (Ameralik), Piniarfik 5 (Qeqertarsuatsiaat), Piniarfik 6 (Qassit), Piniarfik 7 (Neria) kiisalu Piniarfik 8 (Nuussuaq): Piniarfinni pineqartuni tamani ukiuunerani sapaatip akunnerini pingasuni inuussutissarsiutigalugu tuttunniarnissamut tuttunik 100-nik pisassiisoqarpoq.
  • Piniarfik 9 aamma 10 (Kangerluarsorujuk, Nuna Prudhoe kiisalu Nuna Inglefield): Allannguutaasinnaasut ukiukkullu piffissami nunaminertamilu killilikkami tuttunniarneq piniartut kommunillu akornanni eqqartorneqarsinnaapput.

Tunngavilersuutit: Aqutsiveqarfimmi Nuuk-mi sunngiffimmi pinialuttartut 1. maaji sioqqullugu 2016-imi piniarnermut allagartamik akiliinikut 1.053-iupput piniarfinnilu Akia-Maniitsoq-mi aamma Ameralik-mi tuttut siornamut naleqqiullugu ikinnerulersimallutik. Akia-Maniitsoq-mi tuttut 2001-imi taamaalillutik 46.236-iupput 2010-milu 24.000-iullutik taamatullu Ameralik-mi 2001-imi 31.880-iupput 2012-imilu 11.700-iullutik, imm. 2 takuuk.

Aamma paasineqarpoq tuttutanik nalunaarutit taamaallaat 1/3 miss. utertinneqartartut, tamannalu akueriuminaappoq.

Piniarfik 2-mi (Sisimiut-Kangerlussuaq) tuttut ikilisarniarlugit ukiuunerani sapaatip akunnerini pingasuni killeqanngitsumik inuussutissarsiutigalugu tuttunniartoqassaaq, imm. 3 takuuk. Naalakkersuisup kissaataa malillugu Piniarfimmi 1-mi, 4-mi, 5-mi, 6-mi, 7-mi kiisalu 8-mi inuussutissarsiutigalugu piniartut ukiuunerani killilimmik tuttutassinneqarput, imm. 4 takuuk.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniutigissallugilluunniit inerteqqutaammata.

Umimmaat
  • Aqutsiveqarfik Maniitsoq: Piniarfik 2-mi Kangerlussuup kujataata-kangianiittumi ukiuunerani 2017-imi inuussutissarsiutigalugu umimmanniarneq 22. januari aallarnerfigalugu ammaqqinneqassaaq 31. januaari ilanngullugu ingerlassalluni.  Piniarfik 2-mi umimmattassiissutit 400-iupput. Piniarfik 3-mi ukiuunerani 2017-mi inuussutissarsiutigalugu umimmanniarneq 10. januarimi aallartissaaq 10. martsi ilanngullugu ingerlassalluni. Piniarfik 3-mi umimmattassiissutit 800-iupput. Piffissami 10. januaarimiit 10. martsi ilanngullugu  ukiuunerani inuussutissarsiutigalugu aamma sunngiffimmi umimmanniarneq Piniarfik 1-imi ingerlassaaq tassanilu motoorilinnik ingerlaartoqaqqusaanani.
  • Aqutsiveqarfik Sisimiut: Ukiuunerani umimmanniarneq matuneqarpoq.
  • Aqutsiveqarfik Qaanaaq: Piniarfimmi Kangaarsummi inuussutissarsiutigalugu sunngiffimmilu piniarnissamut umimmattassiissutit 40-put. Piniarfimmi Nuna Inglefield-imi inuussutissarsiutigalugu sunngiffimmilu piniarnissamut umimmattassiissutit allannguuteqaratik 60-iupput.
  • Aqutsiveqarfik Ivittuut: Inuussutissarsiutigalugu piniartut Kujallermeersut, Nuuk/Paamiut-meersut kiisalu Arsummeersut ukiaanerani umimmanniarnissamut immikkut piffissaliussaqarput sunngiffimmilu piniartut aamma immikkut piffissaliussaqarlutik. Angutivissanik imaluunniit arnavissanik amerlavallaanik pisaqartoqartarnera pillugu ajornartorsiutip aaqqinnissaanut immikkut suiaassusilikkanik umimmanniarneq ingerlateqqinneqarpoq. Inuussutissar-siutigalugu sunngiffimmilu piniarnissamut umimmattassiissutit 400-put.
Tunngavilersuutit: Qaanaap aqutsiveqarfiani Kangaarsummi minnerpaaffiliinikkut kisitsereernerup kingorna inuussutissarsiutigalugu aamma sunngiffimmi piniarnissamut umimmattassiissutit 40-nngorput, imm. 8 takuuk. Kangerlussuup eqqaani Piniarfik 2-mi ukiuunerani 2016-imi minnerpaaffiliinikkut kisitsereernerup kingorna ukiuunerani 2017-imi inuussutissarsiutigalugu umimmanniarneq killilimmik ammaqqinneqarpoq pissutigalugu umimmaat piniarfimmut pineqartumut uteqqilereermata. Kangerlussuup eqqaani Piniarfik 3-mi ukiuunerani 2017-imi 800-nik umimmattassiisoqarpoq pissutigalugu ukiuunerani killeqanngitsumik piniarneqartarnerat umimmaqatigiinnut sunniuteqarpallaaqimmat, imm. 6 takuuk. Sisimiut aqutsiveqarfiani umimmaat ikippallaalernerat pissutigalugu ukiuunerani umimmanniarneq matuneqarpoq, imm. 7 takuuk.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniutigissallugilluunniit inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq APNN-imut qinnutigineqarsinnaavoq.

Sunngiffimmi piniarnermut allagartap 1. maaji sioqqullugu akilereersimanissaa pillugu piumasaqaat atuutinneqarpoq taamatullu sunngiffimmi piniarnermut akuersissutit inunnut Kalaallit Nunaanni najugalittut inuit nalunaarsorsimaffiannut nalunaarne-qarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani 2016-mi 2017-milu ukiuunerani tuttunik Piniarfik 1-11.

Ilanngussaq 3: Kalaallit Nunaanni 2016-mi 2017-milu ukiuunerani umimmaqatigiit.

Ilanngussaq 4: Maniitsup aqutsiveqarfiani umimmannik Piniarfik 1, 2 aamma 3.

Sukumiinerusumik paasissutissat pissarsiarineqarsinnaapput immikkoortoqarfiup pisor-taanut Amalie Jessenimut saaffiginninnikkut amalie@nanoq.gl - oqa. 345304/553342