Nunalerineq pillugu Siunnersuisoqatigiit avammut oqaaseqaataat

Savaateqarfik

Nunalerineq pillugu Siunnersuisoqatigiit 38-ssaanik Narsami 29. juni 2016 ataatsimiipput

Siunnersuisoqatigiit kingullermik ataatsimiinnerminni pingaarutilinnik nunalerineq pillugu eqqartukkaminnik makku iluatsillugu avammut oqaaseqaatigerusuppaat:

Siunnersuisoqatigiit Naalakkersuisunut uteqqillugu ilungersuutigaat ESU-mi akiitsutoqqat piaarnerpaamik isummakkeerfigineqarnissaat pillugu Naalakkersuisunit aalajangiiffigineqarnissaanut piumasaqaateqarluni. Taanna piumasaqaat Nunalerineq pillugu Ataatsimiititaliarsuup isumaliutissiissutaani inassuteqaataanilu pingaarnerit ilagaat. Siunnersuisoqatigiit ilisimavaat taamatut iliuuseqarneq inatsimmik allannguinissamik kinguneqartoq. Taamaattumik Siunnersuisoqatigiit ilungersuutigaat kingusinnerpaamik Inatsisartut ukiakkut 2017-imi ataatsimiinnissaanut inatsimmut allannguutissatut siunnersuummik saqqummiisoqassasoq.

ESU-mi akiitsutoqqat isumakkeerutiginerani, savaatilinni sanngiinnerusuni akunnattumillu inissisimasuni uniffitoqqat ilungersunartut aamma aningaasaqarniarnikkut ajornartorsiutit malunnaatilimmik millisinneqassasut taamaalinikkullu ineriartornissamut periarfissiisoqassasoq aammalu isumannaannerulersitsisoqarluni. Taamatut iliuuseqarnermi naatsorsuutigineqarpoq kinguaariit tulliannut ikaarsaariarnerit oqinnerulissasut aamma nukiit nutaat nunalerinermi inuussutissarsiuteqarnermi pilersinneqarsinnaassasut.

Savaateqarfiup ataatsip agguaqatigiissillugu isertitai 2014-imi 826.000 kr.-upput. Taakkunannga pisortanit savaateqarfinnut toqqaannartumik tapiissutit 159.000 kr.-upput, tamassumalu assigaa isertitat 19 %-ii. Isertitat annertuumik siammaqqapput, 400.000-niit 1.800.000 kr.-nut nikerarlutik. Nikinganerujussuaq pissutaalluni, savaateqarfiit isertitaannik ersarissumik takussutissiisoqarsinnaanngineranik kinguneqarpoq.

Taassuma saniatigut Siunnersuisoqatigiit isumaqarput Nunalerinermi inuussutissarsiornermi ESU-mut akiitsutoqqanik ajornartorsiuteqarnermik pisortanit isiginngitsuusaarineq toqqaannartumik ineriartortitsinissamut periarfissiinngitsoq aammalu toqqammavissiinissamut kiisalu aserfallatsaaliuinissamut mattussisoq. Aammattaaq siunnersuutigineqarpoq 6 mio. kr-t immikkut nunalerinermi inuussutissarsiornermut aningaasaliissutaasut akiitsutoqqanik isumakkeerinninnermut atorneqartariaqartut, 2015-mi aningaasaliissutaasimasut tamakkiisumik atorneqarsimanngimmata aammalu naatsorsuutigineqanngimmat ukioq manna tamakkerlugit atorneqarnissaat.

Immikkut aningaasaliissutit aningaasaliissutaareersullu inissisimanerup pitsap tungaanut sangutissappassuk pisariaqarpoq inatsisinik allannguinissaq aammalu aningaasaliinermi piumasaqaatinik eqaallisaanissaq. Taamaaliornikkut taamaallaat aningaasaliissutit annertusaanermik pilersitsissinnaassammata.

Siunnersuisoqatigiit ilaasortaat isumaqatigiipput Nunalerinermi Nakkutilliisut Ataatsimiititaliaat nukittorsarneqassasoq aammalu suleqataasut akornanni sulineq pitsaanerusumik ataqatigiissaarneqalissasoq. Nunalerinermi Nakkutilliisut Ataatsimiititaliaat ukuninnga ilaasortaqarpoq; SPS, Kommune Kujalleq kiisalu Nunalerinermut Siunnersorteqarfik. Aammattaaq isumaqatigiissutigineqarpoq Uumasut Nakorsaqarfia Inuussutissalerinermilu Oqartussaqarfik aalajangersimasumik ataatsimiititaliamut ilaasortaalernissaa.

Nakkutilliisut ataatsimiititaliaata savaatillit nersutinik passussinissamut suliaqarnissamullu malittarisassanik atuuttunik eqquuttitsinissaat nakkutigissavaa. Siunnersuisoqatigiit isumaqatigiipput nunaminertanik pitsaanerusumik nakkutilliinissaq ingerlanneqassasoq, taamaasilluni nunaminertanik atuinissamut akuersissutit pitsaanerpaamik isumatusaarnerpaamillu iluaqutigineqassammata.

Naggasiutigalugu Nunalerineq pillugu Siunnersuisoqatigiit ukiuni kingullerni aappaa affarmi Kujataani perlerunnermik nappaateqarnermut ajornartorsiutit tassungalu atatillugu innersuutigineqarluni Uumasut Nakorsaqarfia Inuussutissalerinermilu Oqartussaqarfik akiuussutissamut suliniummik pilersaarusiussasoq perlerunnermut nappaateqarneq minnerpaaffianiitinniarlugu.

Nunalerineq pillugu Siunnersuisoqatigiit sinnerlugit

Niels Lund

Siulittaasoq

Tlf. 199211