Jeremiassenip uumasut tunngavigalugit aningaasarsiornissaq taperserpaa

Aalisarnermut, Piniarnermut Nunalerinermullu Naalakkersuisoq, Nikolaj Jeremiassen, Finlandimi Nunani Avannarlerni Ministerrådip ulluni makkunani ataatsimiinnerani peqataavoq.

Aajuna Aalisarnermut, Piniarnermut Nunalerinermullu Naalakkersuisup Nunani avannarlerni uumasut tunngavigalugit aningaasarsiornermi immikkut ilisimasalinnik pilersitsisoqarnissaa pillugu oqalugiaataa.

“Nunani avannarlerni uumasut tunngavigalugit aningaasarsiornermi immikkut ilisimasalinnik pilersitsisoqarnera iluarisimaarpara aamma ilisimatitsissutigisinnaavara, suliamut pingaarutilimmut tassunga Kalaallit Nunaanniit peqataagatta.

Kalaallit Nunaanni nuna tamakkerlugu uumasut tunngavigalugit aningaasarsiornermi periusissamik peqanngilagut, kisianni nunani avannarlerni killerni uumasut tunngavigalugit aningaasarsiornermi immikkut ilisimasalinnut ilaasortaavugut, tassanilu eqqarsaataalluni, uagut nunani avannarlerni killerneersugut ikioqatigiilluta nunani avannarlerni uumasut tunngavigalugit aningaasarsiornermi immikkut ilisimasalinnut ilanngussisinnaasugut aamma taamaaliornitsigut nunani avannarlerni inissisimaffitsinni pingaarnersiuinernut sakkortuumik oqariartuuteqarsinnaavugut.

Naluneqanngitsutut Savalimmiut , Islandip aamma Kalaallit Nunaata annerusumik minnerusumilluunniit aalisarnermik inuussutissarsiuteqarneq assigiissutigaat, taamaammat imaani uumassusilinnik tunngaveqarluni aningaasaqarnerup iluaqutigineqarneranik ineriartortitsineq uagutsinnut pingaaruteqarluinnarpoq.

Uanga nunat avannarliit periusissiaanni pingaartitakka tassaassapput nunarsuatsinni siunissami inuit nerisaqartinniarneranni proteinimik amigaateqarfiulersussami imartatsinni inuussutissat isumannaatsuunissat isiginiassallugu.  Imaani uumassusilinnik pitsaanerusumik iluaquteqarnissamut periarfissarpassuaqarpoq ingammik Nunani avannarlerni killerni periarfissaqarluarpugut. Imartat annertuut, imaani isumalluutit amerlasuut aamma nungusaataanngitsumik ingerlatsineq. Taamaalillunga imaani isumalluutinik pitsaanerusumik iluaquteqarnissamut atatillugu nutaaliornissaq immikkut ilisimasalinnit pingaartinneqassasoq kissaatigissavara.

Imaani uumasut tunngavigalugit aningaasarsiornermi periarfissaqarluarneq nunani avannarlerni uumasut tunngavigalugit aningaasarsiornermi immikkut ilisimasalinnit erseqqissaatigineqarpat nunarsuarmioqatigut sunniuteqarfigalugit takutissinnaavarput nunarsuarmi imartavut inuussutissanik isumannaatsunik pitsaasunik aallerfiusinnaasut.

Immikkut ilisimasallit sulinerat soqutiginnilluarlunga utaqqimaassavara.”

Ataatsimiinneq ippassaq juunip 28-anni aallartittoq aqagu juunip 30-anni naammasissaaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl