Nunanut Allanut Ministerip John Kerry-p Kalaallit Nunaannut tikeraarnera

Junip 17-anni Naalakkersuisut qallunaat misiterii peqatigalugit USA-p Nunanut Allanut Ministeriannut Kalaallit Nunaanut tikeraartitsisuupput. Kalaallit Nunaanni tikeraarneq Naalakkersuisuni ilaasortamit Vittus Qujaukitsumit Danmarkillu nunanut allanut ministeriannit Kristian Jensenimit piareersarneqarpoq.

USA 2017 tikillugu Issittumi Siunnersuisooqatigiinni siulittaasuuffik tigummivaa Nunanullu Allanut Ministerip John Kerry-p Issittup nunarsuarmioqatigiinni qitiuleraluttuinnarnera tikeraarnermi uppernarsarneqarpoq.

Kalaallit Nunaanni tikeraarneq Ilulissani pivoq, John Kerry-lu Naalakkersuisut Siulittaasuannit Kim Kielsen-imit kiisalu Inuussutissarsiornermut, Sulisoqarnermut, Niuernermut Nunanullu Allanut Naalakkersuisumit Vittus Qujaukitsoq-mit tikilluaqquneqarpoq.  

Tikeraarnerup ingerlanerani silaannaap kissakkiartornerata Kalaallillu Nunaannut  unammilligassartaata oqallisigineqarnerata saniatigut USA-p Issittumi Siunnersuisooqatigiinni Siulittaasuutitaqarnerani pilersaarutit, Issittumilu ataavartumik ineriartortitsineq, Kalaallit Nunaat (Thule Air Base) pillugu USA-mik illersornissakkut isumaqatigiissut taamatullu Kalaallit Nunaata ineriartitsinermut pingaarnersiuinera aningaasaliisussanillu pisariaqartitsinera ukkatarineqarput. 

Naalakkersuisut Siulittaasuat Kim Kielsen ima oqaaseqarpoq:

”Tikeraarneq Kalaallit Nunaannut pingaaruteqarpoq. Nunarsuarmioqatigiit akornanni Issittumi kissaatigisat eqqartorneqarneranni Issittumi innuttaasut akuutinneqarnissaat pingaaruteqarpoq. Issittoq pillugu nunarsuarmioqatigiinni suleqatigiinnermi Kalaallit Nunaat immikkuullarissumik inissisinavoq.

USA-p Nunanut Allanut Ministeriannik tikeraartoqarneq Kalaallit Nunaannut pingaaruteqarpoq. Uumatut ittumik tikeraartoqarnermi Kalaallit Nunaannut ilisimasaqarnerulernermik USA-milu taamatullu nuanarsuarmi innuttaasunut USA-p Nunanut Allanut Ministeriannut malinnaasunut Kalaallit Nunaatalu inissisimaneranik soqutigisaannillu ersersitsiniarnermi annertusaaqataavoq. Taamatut maluginiarneqarnissaq uagutsinnut pingaaruteqarpoq, minnerunngitsumillu USA-lu illuatungeriilluta niueqatigiinnitsinnut pitsaasumik sunniuteqassangatillugu.”

Inuussutissarsiornermi, Suliffeqarnermi, Niuernermi Nunanullu Allanut Naalakkersuisoq Vittus Qujaukitsoq ima oqaaseqarpoq:

”Tikeraarneq Kalaallit Nunaannut pingaaruteqarpoq. John Kerry-mik ataatsimeeqateqarnermi oqaloqatigiissutissat ataatsimut piareersaateqarfigisimasavut tikinneqarput.

Kalaallit Nunaanni illersunnissakkut suleqatigiinneq eqqarsaatigalugu USA-p 2014-mi kiffartuussinissamik isumaqatigiissutip Kalaallit Nunaata USA-llu akornanni attaveqaqatigiinnermik oqimaaqatigiikkunnaarsitsisup tunniunneqarnerani USA-p aalajangersimanera ersarilluinnartumik nassuiarpara. Kalaallit Nunaat Amerikkap Avannarliup Nunavittaanut ilaavoq, Nunavimmilu isumannaatsuunissamut Thule Air Base qulakkeerinninnissamut pingaarutilittut inissisimalluni. USA-llu sakkutooqarnikkut Kalaallit Nunaanniititaqarnerat siunissami aningaasatigut iluaqutigineqarnissaata siunissamut qulakkeerneqarnissaa ingerlatiinnarneqassaaq.

Tikeraarnermi Thule Air Base-mut tunngatillugu sullissinissamut isumaqatigiissummut tunngasunik aalajangiisoqanngilaq, ilisimasariaqarpullu amerikap eqqartuussiviani suliaq suli ingerlanneqarmat, aalajangiiffigeqaranilu suli, ataatsimiinnermilu Kalaallit Nunaata kissaatigisai paasineqartut naqissuserneqarpoq.”  

 

Apeqqutissaqarussi attavigisinnaavarsi: Nunanut allanut pisortaqarfik: Kai Holst Andersen, kaoa@nanoq.gl, +299 55 33 31