Ilimanaq tikilluaqqusivoq

Ippassaq Ilulissat Kangiani tikeraat ornittagassaata - Isfjordcenterip - maanna pilersaarusiorneqartup tamanut tusagassiarereernerani ullumikkut Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq tikeraat tusagassiortullu ilagalugit nunaqarfimmut Ilimanamut tikeraarput.

Nunaqarfimmi aqutsisut siulittaasuata Fritz Johansen-ip tikilluaqqusereernerani Peter Cederfeld, RealDania Byg-imi pisortaasoq RealDania Byg-imi suliniutsinut aqutsisoq Frantz Frandsen peqatigalugu oqaluttuarpoq Ilimanami illorsuarnik allanngutsaaliukkanik iluarsaaneq pissanganartoq maannalu ingerlanneqartoq pillugu, aappaagumiit neriniartarfittut, ataatsimiittarfittut, saqqummersitsivittut equmiitsulianillu tuniniaavittut atorneqarlertussat pillugit. 

Angalanermi aamma peqataapput Thue Christiansen, nunatsinni Ilinniartitaanermut, Kultureqarnermut Ilagiinnullu Naalakkersuisoq siulleq. Angallammik ingerlaarnermi Thue oqaluttuarpoq qaaqqusanut angalasunut aamma tusagassiortunut, nunatta erfalasuata pileriartornera pillugu, pisortatigoortumik siullerpaamik 1985-imi atoqqqaartinneqartumut, ukioq mannalu siullermeersumik Danmark-imi pisortatigoortumik inuiattut ullorsiornerput eqqorlugu aamma amuneqartumut. Thue Christiansen Naalakkersuisut sinnerlugit Takornariat ornittagassaannut toqqaasussatut kommité-mi ilaasortaavoq.

Toqqaasussatut kommité-mi kalaallit ilaasortaatitaasa aappa Ono Fleischer, Qaasuitsup Kommunianit toqqagaasoq aamma nunaqarfimmut meeraaffigisimasaminut tikeraaqataavoq. Ono Fleischer ilaatigut ilisarisimaneqarluarpoq issittumi ilisimasassarsiorluni qimussimik angalasarnerpassuarminik, Qaanaamut, Canada-mut Alaska-mullu. 

”Assut nuannaarutissaavoq takullugu Ilimanap ineriartortitsinissamut periarfissamik tigusisimanera, RealDania Byg-ip aamma World of Greenland-ip peqatigiinnissamut isumaqatigiissuteqarnerisigut Ilimanamut periarfissaalersimasumik, Vittus Qujaukitsoq oqaaseqarpoq, ingerlaqqillunilu: suliniutip pitsaasumik tiguneqarsimanera tunngaviulluinnarpoq ullumikkut iluatittumik peqataaffiulluartumillu ingerlatsisoqarneranut, Ilimanami namminermi aammalu Ilulissani suliffissat pilersinneqartalereersimammata, suliniutip maanna killiffigisaani”.

Pilersaarutaavorlu aasaq manna takornarianut illuaqqat siulliit atorneqalereernissaat, illullu allanngutsaaliugaasut naammassillugit suliarineqareerunik aappaagu ammarneqartussaallutik. Qularutissaanngilarlu takornariarlutik misigisassarsiortunut Ilulissanut annguttartunut periarfissat nutaat taakkua amerliartuinnartunit tigulluarneqarumaartut. 

Annerusumik paasissutissinneqarniaraanni attavigineqassaaq Naalakkersuisoqarfimmi pisortaaneq Jørn Skov Nielsen, mobil 556188.