Kulturikkut nersornaat Siiva Fleischerimut aamma Sørine Steenholdtimut

Ukioq manna Kulturikkut Nersornaat nipilersortartumut Siiva Fleischerimut tunniunneqarpoq, nutaatullu atuakkiortumut Sørine Steenholdtimut Naalakkersuisut kajumissaatitut nersornaasiuttagaat tunniunneqarluni. Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsenip Katuami nersornaatit taakku marluk Inuiattut Ullorsiorfimmi juunip 21-ani tunniuppai.

Siiva Fleischeri pillugu Nivi Olsen ilaatigut oqarpoq:

-       Immikkuullarissumik erinaqarpoq nunatsinnilu erinarsortartut pikkorinnerpaat ilaattut isigineqarluni. Taalliai pingaarnertut ulluinnarni inuunermut tunngasuugajupput, tusarnaartullu nammineq takorluuisinnaassutsini atorlugu qanoq paasiumanerlugit isummersorfigisinnaavai. Taalliaasalu ilaat allat aamma inuttut assigiinngissutsitta aaqqiagiinngissutsittalu akuerinissaannut sammisuusarput, siunissatsinnilu nutaamut ingerlaqqinnissatsinnik oqariartortuusarlutik. Taallat oqaasertaasa sammisaat nunatsinni pissutsinut sammisarput, inuunermut, asanninneq aammalu inuunermi aporfissanut tunniutiinnannginnissamik oqariartortuusarlutik. Taalliat torrallallugit allatat tusarnersullu, tusarnaartut alutorisaat nuannarilluagaallu. 

Sørine Steenholdti pillugu Nivi Olseni ilaatigut oqarpoq:

-       Saqqummersitseqqaarnermigut takutippaa sapernagu silarsuatsinnit piviusumit misigisaminik atuakkiorneq sakkugalugu allaaserinnissinnaaneq, taakkualu oqaluttualiornerup silarsuanut nuussinnaanerat, assigiinngitsunik inuttalimmi pisoqartitsiviusumik. Atuakkiamigut inuiaqatigiinni pissutsit isorinnittumik eqqorluarlugillu allaaserisarpai, soorlu persuttaasarneq, imigassamik atornerluineq aamma meeqqanik isumassugassanik sumiginnaasarneq, taamalu uagutsinnut takutissimallugu inuiaqatigiinni artornartortaasut ingammik meeqqanut qanoq sunniuttarnersut.

Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr-nik aningaasartaqartoq nutaajuvoq ukioq mannalu siullermik tunniunneqarpoq. Taannalu ukiuni tulliuttuni inuusuttumut piginnaasalimmut Kulturikkut Nersornaasiisoqarnerani aamma tunniunneqartassaaq.

 

Nivi Olsenip oqalugiaataa.

 

Attavissaq: Pia Lynge (Departementet for Uddannelse, Kultur, Forskning og Kirke) Toqq/direkte 345706

PILY@nanoq.gl