Kalaallit inooqataanermi ajornartorsiortut oqallisigineqarput

Qassimiuaarnermi arnat kalaallit ajornartorsiortut pillugit paasisimasallit oqallinnerannut peqataanissamut Naalakkersuisoq Martha Lund Olsen Inooqataanermi ajornartorsiortunut siunnersuisooqatigiinnit (Rådet for Social udsatte) qaaqquneqarpoq.

Siunnersuisooqatigiit siulittaasuat Jann Sjursen oqallinnermi aqutsisuuvoq, tassanilu nalunaarusiaq 2016-imi martsimi saqqummersinneqartoq tunngavigalugu Danmarkimi arnat kalaallit ajornartorsiortut suiaassutsimut tunngasutigut ajornartorsiuteqartarnerat sammineqarpoq. Oqallinnerup takutippaa tamaginni ilisarnaataasartoq tassaasoq atornerluisut akornanni innarliinernillu atugaqarlutik kingunerluttartumik peroriartorsimaneq, amerlanertigut kinguaariiaani arlalinni. Arnat taakkua Danmarkimut tikikkaagamik, kingunerlutsitsinerit aammalu atornerluinernik ajornartorsiuteqarnerit saniatigut aamma Danmarkimi isumaginnittoqarfimmut peqqinnissaqarfimmullu ornigunnerminni kulturikkut oqaatsitigullu aporfeqartarput.

Kalaallit Nunaata aamma Danmarkip kulturikkut assigiinngissuteqarnerat ataqqillugu pitsaanerusumik akuulersitsiniarnissaq Danmarkimi isumaginnittoqarfimmi maannakkut pisartunit annertunerusumik qulakkeerniarneqartassasoq, kiisalu kalaallit kulturianni aammalu innuttaasut pisinnaatitaaffiinut nalinginnaasunut, soorlu assersuutigalugu oqalutseqarnissamik periarfissaqarnermut, annertunerusumik paasisimasaqalernissaq, oqallinnermi Naalakkersuisoq  Martha Lund Olsen-ip kajumissaarutigai.

Kinguaassiutitigut atornerlugaasimanerup kingunerisaanik inersimasunngornermi kingunerlutsitsisarnerit, atornerluisunik katsorsaasarneq aamma nalinginnaasumik meeqqat atugarisaasa pitsanngorsarneqarnissaat pillugit Naalakkersuisut suliniutaat, aamma arnat inooqataanerminni ajornartorsiortut Danmarkimut nuunnissaminnik toqqaasartut ikilisinniarlugit suliaqarnermi aamma pingaaruteqartorujussuarnut ilaasut, ataatsimiinnermi uppernarsisimallugu, Naalakkersuisoq Martha Lund Olsen ataatsimeereernerup kingorna oqarpoq.