Bornholmimi Qassimiuaarnermi tusarnaartut akornanni kalaallit periaasiat nuannarineqarpoq

Naalakkersuisoq Martha Lund Olsen, Bornholmimi Qassimiuaarnermi peqataasoq, oqallinnermut qulequtaqartumut ”Kinguaassiutitigut innarligaasimanerup inersimasunngornerminni kingunerlutsitsisunut nunami namminermi iliuusissanut pilersaarut” qaaqqusaavoq.

Oqallinnerup SPOR-imit, inunnut kinguaassiutitigut innarligaasimanerup kingunerisaanik inersimasunngornerminni kingunerlutsitsisunut nammineq kajumissutsimik kattuffiusumit, aaqqissuussaasup nalaani Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq Martha Lund Olsen-ip periaaseq Kalaallit Nunaanni suliaqarnermi malinneqartoq, saqqummiuppaa. Oqalliseqataasuni ilaatigut peqataapput folketing-imi ilaasortat Karin Nødgaard (Dansk Folkeparti) aamma Karen J Klint (Socialdemokraatit), taakkua marluullutik tamarmik kinguaassiutitigut innarligaasimasunut inersimasunngornerminni kingunerlutsitsisunut nunami namminermi iliuusissanik pilersaarummut oqartussaasut assigiinngitsut kikkut aammalu qanoq akisussaasuussanersut tunuarsimaarfigaat.

Naalakkersuisunut ilaasortaq Martha Lund Olsen, oqallinnermi peqataasoq, tusarnaartut akornanni oqarami nuannarineqarpoq; ”Soorunami suliniutit immikkoortortap suup -  peqqissutsimut suliassaqarfiup, isumaginninnermut suliassaqarfiup allalluunniit - ataaniissanersut oqallisigineqarsinnaavoq. Taamaattoq pingaarnerpaaq tamatigut tassaasussaavoq akisussaaffimmik tigusisoqarnera aammalu oqaaserineqartartut tunuliaqutaralugit iliuuseqarnissaq. Kalaallit Nunaanni taamaaliorpugut aammalu neriuutigaara Danmarkip tamanna ilinniarfigisinnaassagaa”

Annertunerusunik paasisaqarusunnermi attaveqarfissaq Naalakkersuisumut allatsi Hanne Nielsen tlf 539371