Nunatsinni Ilisimatusarnermik Siunnersuisoqatigiit nutaamik siulittaasortaarput

Naalakkersuisut toqqaqqammerpaat lektor, ph.d. Gitte Trónheim, Ilisimatusarfiup pisortaa, Nunatsinni Ilisimatusarnermik Siunnersuisoqatigiit siulittaasussaattut. Taamaasilluni Gitte Trónheimip siulittaasutut taarserpaa professor Minik Rosing, Geologisk Museum, Københavns Universitetimeersoq. Nunatsinni Ilisimatusarnermik Siunnersuisoqatigiit 2013-mi pilersinneqarneraniilli Minik Rosing siulittaasuusimavoq.

Nunatsinni Ilisimatusarnermik Siunnersuisoqatigiit Gitte Trónheimip siulittaasuuffigiligai nunarput tamakkerlugu allanullu attuumassuteqarani pisortanit ingerlatsiveqarfiuvoq, ilisimatusarnerup siuarsarneqarnissaanik pitsanngorsartuarnissaanik, kalaallinullu inuiaqatigiinnut iluaqutaajuarnissaanik suliaqartoq.

Ilinniartitaanermut, Kultureqarnermut, Ilisimatusarnermut ilageeqarnermullu Naalakkersuisoq Nive Olsen ima oqaaseqarpoq:

Siunnersuisoqatigiinni siulittaasuusimasoq professor Minik Rosing naalakkersuisut sinnerlugit qutsaviginiarpara, Ilisimatusarnermut Siunnersuisoqatigiit ukiuni siullerni pingasuni atuunneranni sulilluarsimaneranut, Nunatsinnilu Ilisimatusarnermut Siunnersuisoqatigiinnut ilisimasassarpassuarnik tunniussisimaneranut nunatsinnut tamarmut iluaqutaasussanik. Taama oqarniutaa siunnersuisoqatigiit siulittaasortaavat arnaq, Ilisimatusarfiup pisortaa, lektor, ph.d. Gitte Trónheim atuuffissaanut nutaamut tikilluaqquniarpara. Gitte Tronheim Nunatsinni Ilisimatusarnermik Siunnersuisoqatigiinni ukiuni pingasuni ilaasortaareersimavoq, ph.d-mik soraarummeersimanermigut Ilisimatusarfimmilu lektoritut pisortatullu atorfeqarnermigut Nunatsinni ilisimatusarnermik sulianik ilisimasaqarluarluni. Siulittaasortaaq Gitte Trónheim siunnersuisoqatigiillu tamaasa nunatsinni ilisimatusarnermik sullissilluarnissaannik, sulilluarnissaannillu kissaappakka”.

Kalaallit Nunaanni Ilisimatusarnermut Siunnersuisoqatigiit ph.d-Stipendienut, erhvervs-ph.d-nut aamma post.doc-inut taamatullu ilisimatusarnerup siuarsarneqarneranut ilisimatusarnermut aningaasaliissutinik agguaassisarpoq. Siunnersuisoqatigiinni ilaasortat arfineq pingasut ukiuni pingasuni atuuttussatut toqqarneqartarput, ukiumullu minnerpaamik marloriarlutik ataatsimiittarlutik. Kalaallit Nunaanni Ilisimatusarnermut Siunnersuisoqatigiit ilisimatusarnikkut suliassaqarfinnit tamanit katitigaavoq.

Nunatsinni Ilisimatusarnermik Siunnersuisoqatigiit pillugit sukumiinerusumik paasisaqartoqarsinnaavoq siunnersuisoqatigiit nittartagartaavannut iserluni adressikkut www.forksningsraadet.gl ; imaluunniit siulittaasortaaq Gitte Trónheim attavigalugu oqarasuaat (299) 38 56 52, e-mail: gitr@uni.gl

Kiisalu siunnersuisoqatigiinni allattaagallartoq cand.mag. Juaaka Lyberth attaveqarfigineqarsinnaavoq e-mail: july@nanoq.gl ; oqarasuaat (299) 34 57 22/ 499459