Meeqqat aalisarlit

Aasaq nalliuppoq. Aasaanerani amerlanerusut ukiornissaanut pilillutik katersisarput aammalu aalisariartarluta. Immaqa aalisakkanik iganermut ilitsersuummik mamarunartumik peqarputit? Peqqissutsimut Naalakkersuisoqarfiup meeqqat inuusuttullu 18-it inorlugit ukiullit tamaasa aalisakkanik iganermut ilitsersuummik pitsaanerpaamik unammisitsinermut peqataanissaannut pilerisaarpai.

 

2016 innuttaasut peqqissusaat pillugu programmiata Inuuneritta II-p nerisaqarnermut ukioritippaa. “Meeqqat inuussutissallu” qulequtaralugu ukioq ilaatigut aalisakkanik iganermut ilitsersuummik unammisitsinikkut malunnartinniarneqarpoq. Ajugaasunut akissarsiassanik pitsassuarnik peqarpoq, iganermut ilitsersuut 2017-imi meeqqanut aalisakkanik iganermut ilitsersuummik atuakkiamut ilaatinneqarpat.

-”maani nunap pissarititai qanoq peqqinnartumik nerisassiarineqarsinnaanerisa siammarterneqarnissaa angorusupparput, minnerunngitsumillu aalisakkat mamarluinnartut qanoq suliarineqarsinnaaneri” oqarpoq Naalakkersuisoq Doris Jakobsen, nangillunilu:

 

-”ilaqutariit isumassarsiortikkusuppavut qitornatik nerisassioqatiginissaannut aalisakkallu mamartuliaritillugit. Ileqqut peqqinnartut meeraanermit tunngavilerneqartarput. Qitornavut igaffimmut isertikkutsigit nerisassiassallu attortikkutsigit ooqattaartillugillu taava nerisassiornissamut soqutiginninnerat inerisassavarput tassungalu atatillugu peqqinnartutortarnissaat aqqutissiuullugu.”

 

Nerisaqarnermut ukiorititaasup anguniagai aallaaveqarput Nerisaqarnermut Timigissarnermullu Siunnersuisoqatigiit Nerisaqarnermut innersuussutaat qulit aallaavigalugit. Siunnersuutit ilaat tassaavoq: ”kalaaliminertortarit; akulikitsunik aalisagartortarit qallersuutitullu atukkit.”

 

Aalisakkat peqqinnartunik orsoqarput aammalu D vitamiineqarlutik imarmiunullu allanut imartatsinniittunut sanilliullugit imatut annerusumik mingutsinneqarsi­manngillat.

 

Unammisitsineq pillugu atuagaqarit aalisakkanik iganermut ilitsersuutit pillugit uani Peqqik.gl

Annerusumik paasissutissanik perusukkuit attavigisinnaavat Naalakkersuisup allattaa Rosa Thorsen oqarasuaatikkut +299 55 33 03 imaluunniit e-mail: rosat@nanoq.gl.