Pisuussutit nungusaataanngitsumik atorluarneqassapput

Atlantikup Avannaani nunat aalisarnermut ministeriisa pingaartillugu akuerivaat ilisimatuussutsikkut misissuinerit tunngavigalugit piujuaannartitsilluni qularnaatsumik aalisarneq aamma imaani nerisaqaqatigiit avatangiisiisa aalajaatsumik  piujuaannartinneqarnissaat.

Taama Atlantikup Avannaani nunat aalisarnermut ministeriisa ataatsimoorlutik nalunaarutaanni ilaatigut allassimasoqarpoq.

Aalisarnermut ministerit Ruslandimi juunip 7-annit 13-iannut ataatsimiimmata Aalisarnermut, Piniarnermut Nunalerinermullu Naalakkersuisoq, Nikolaj Jeremiassen peqataavoq.

Ataatsimeeqataasut erseqqissarpaat ilisimatuussutsikkut misissuinerit tunngavigalugit piujunnaartumik aalisarnerup pingaaruteqassusia aamma imaani nerisaqaqatigiit avatangiisiisa piujuaannarnissat, aamma aqutsinermi.

Immani piujuaannartitsiniarluni aqutsineq naalagaaffiit suleqatigiilluarnissaannik pisariaqartitsivoq, ilisimatuussutsikkut misissuinernit katersorneqartut paarlaasseqatigiinnerillu aamma suleqatigiissutigineqartariaqarlutik, taakku peqassutsinut nalilersuutaasassallutik. Ataatsimut ajornartorsiutaalersut ilisimatuussutsikkut ataatsimoorluni aaqqinniagassaassapput, ataatsimeeqataasut ilaatigut taama erseqqissaassuteqarput.

Aalisarnermut ministerit nalunaarutaat tamakkiisoq kingusinnerusukkut nalunaarutigineqarumaarpoq, nalunaarut nunat peqataasut oqaasiinut nutserneqarsimaleriarpat.

 

Ataatsimeersuarnermit assilisat takukkit.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl