USA-p nunanut allanut ministeria John Kerry Naalakkersuisut tikilluaqquaat

Naalakkersuisut qallunaat naalakkersuisui peqatigalugit USA-p nunanut allanut ministeriata John Kerryp Kalaallit Nunaannut juunip 17-anni tikeraarnerani tikeraartitsisuussapput. Ulloq sioqqullugu John Kerry Danmarkimi tikeraassaaq, tassanilu statsministeri Lars Løkke Rasmussen nunanullu allanut ministeri Kristian Jensen ataatsimeeqatigissallugit.

Kalaallit Nunaannut tikeraarnissaq Naalakkersuisuni ilaasortamit Vittus Qujaukitsumit Danmarkillu nunanut allanut ministeriannit Kristian Jensenimit piareersarneqarpoq. Issittup tassanilu Kalaallit Nunaata nunarsuarmioqatigiinni qanoq qitiulluinnartiginera tikeraarnermi uppernarsarneqarpoq.

Kalaallit Nunaannut tikeraarnissaq Ilulissani pissaaq, tassanilu immikkut silaannaap kissakkiartornera taassumalu Kalaallit Nunaannut unammillernartui immikkut ukkatarineqassallutik. Taakku saniatigut politikkikkut oqaloqatigiinnissaq USA-p Issittumi Siunnersuisooqatigiinni siulittaasuuneranut pilersaarutit tikinneqarnissaat naatsorsuutigineqarpoq. USA-p Kalaallit Nunaannik (Thule Air Base) illersornissakkut suleqatiginninnerat John Kerrymik ataatsimeeqateqarnermi tikinneqassapput.

Inuussutissarsiornermi, Suliffeqarnermi, Niuernermi Nunanullu Allanut Naalakkersuisoq siusinnerusukkut John Kerrymik ataatsimeeqateqareernikuuvoq – taanna Issittumi Siunnersuisooqatigiit ministeriisa aprilimi 2015 Iqalunni ataatsimiinneranni taamatullu GLACIER ministerit ataatsimiinneranni augustip 30-ani 2015 pisumi pilluni. Tassani Kalaallit Nunaannut tikeraarsinnaaneq eqqartorneqarpoq. 

Naalakkersuisut Siulittaasuat ima oqaaseqarpoq:

”John Kerryp Kalaallit Nunaannut tikilluaqqunissaanut qilanaaqaanga.

Tikeraarneq pingaarutilerujussuaq, pingaartumik amerikkami innuttaasunit Kalaallit Nunaannut ilisimasaqarnerulernermik kinguneqartussaassaaq. Taama tikeraartoqarnermi nunatta avammut nittarsaalluarnissaa pingaarutilipilussuuvoq, tassuuna aningaasaliisinnaasut takornarissat aammalumi USA-mik attaveqarnitta annertusarnissaanut qammarsinnaammata.”

Inuussutissarsiornermi, Suliffeqarnermi, Niuernermi Nunanullu Allanut Naalakkersuisoq  ima oqaaseqarpoq:

”Tikeraarnissaq qulakkeerniarlugu nunanut allanut ministeri Kristian Jensen qanimut suleqatigisimavara. Namminersorlutik Oqartussat ukiuni arlalinni annertuumik sulereernerisigut tikeraarnissaq piviusunngorpoq, tassani Kalaallit Nunaata Washingtonimi aallartitaqarfia USA-mi aalajangiisinnaasunut saqqumilaarsitsilluarneratigut ingerlasimalluni.

Tikeraarnerup ersersippaa suleqatinut qaninnernut qanilaartumik  peqataanissap qanoq pingaartiginera ersersippaa, John Kerryllu tikeraarnissaanut qilanaaqaanga, tassanilu USA-p illersornissamut suleqatiginera qulequttatut pingaarutilipilussuartut qaqinneqartussaavoq.”

 

 

Apeqqutissaqarussi attavigisinnaavarsi:

Nunanut allanut pisortaqarfik: Kai Holst Andersen, kaoa@nanoq.gl, +299 55 33 31