Kommunip avinneqarnissaa innuttaasut suli kissaatigaat

Naalakkersuisut Siulittaasiat Kim Kielsen Ilulissani, Qeqertarsuarmi Aasiannilu innuttaasunik ulluni 8. - 10. juuni 2016 ataatsimiititsimmat Qaasuitsup Kommuniata avinneqarnissaanik kissaateqarneq oqaluuserineqarpoq. Qaasuitsup Kommuniani borgmesteri Ole Dorph, kommunalbestyrelsemut ilaasortaq Jess Svane Kristian Brobergilu angalaqataapput.

Naalakkersuisut Siulittaasuata kommunimi Kikkut Tamat Oqartussaaqataanerat pillugu Ataatsimiitsitaliami ilaasortat aamma Kitsissuarsunneeqatigai, ataatsimeeqatigalugillu.

Innuttaasunik ataatsimiititsinernut pingasuusunut takkuttut ”clickers” atorlugit taasitinneqarsimapput kommunip avinneqarnissaa pillugu sunniutissanik BDO-p nalunaarusiaanik ilisimatitsinerup siorna kingornalu. Akissutigineqarsimasut misissoqqissaarneqassapput.

Naalakkersuisut Siulittaasuat Kim Kielsen ima oqarpoq:

”Innuttaasunik ataatsimiititsiartorluta tikitatsinni tamani tikilluaqquneqarluarpugut. Qaasuitsup Kommuniata avinneqarnissaa innuttaasunit suli kissaatigineqarpoq. Tamanna ataatsimiinnerni innuttaasut kinaanerannik isertuussilluni taasititsinermi erserpoq.

Kommunip avinneqarnissaanik innuttaasut kissaateqarnerat ataqqivara, soorlu tamanna naalakkersuisooqatigiinnissamut isumaqatigiissummi aamma allassimasoq. Avitsinermili sunniutissat misissorneqaqqaarnissaat pisariaqarsimavoq. Misissuinerup inernera Naalakkersuinikkut Ataqatigiissaarisoqatigiinnut sapaatip akunnerata matuma siorna saqqummiunneqarpoq. Aalajangerneqarpoq sulinerup ingerlariaqqinnissaanut kommunalbestyrelse akisussaasuusoq. Kommunalbestyrelse Naalakkersuisunut innersuussuteqassaaq, Naalakkersuisullu Inatsisartunut aalajangiiffigisassamik tunngaviliissallutik.”

Angalanermit assit.

 

Paasisaqarnerorusuttut attavigisinnaavaat Nunami Namminermi Pissutsinut Immikkoortortaqarfimmi pisortaq Martha Abelsen, Naalakkersuisut Siulittaasuata Naalakkersuisoqarfia, oqarasuaat +299 34 50 00 imaluunniit e-mail maab@nanoq.gl.