Danskit kalaallillu ilisimatusarnermut isumaqatigiissutaat atsiorneqarpoq

Danskit kalaallillu ilisimatusarnermut tunngatillugu isumaqatigiissutaat pingaaruteqartoq atsiorneqarpoq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsen-ip sisamanngormat Nuummi danskit ilinniartitaanermut ilisimatusarnermullu Naalakkersuisuat, - Uddannelses- og Forskningsminister - Ulla Tørnes naapisimavaa, ulluni makkunani nunatsinni tikeraartoq.  

Tamatumunngalu atatillugu Naalakkersuisut taakku marluk isumaqatigiissummik atsiugaqarput, Pinngortitaleriffimmut atatillugu Silaannaap pissusaanut ilisimatusarnermik ingerlatsiviup ingerlanneqaannarnissaa qularnaarlugu, aammalu Ph.d.-tut aamma postdocstipendianik ilinniakkat arlaqartut aningaasalersorneqartarnerata ingerlaannarnissaat aamma qularnaarlugu.

”Isumaqatigiissut danskit kalaallillu ilisimatusarnerup tungaatigut pingaartorujussuarmik ingerlatsinerisa ingerlatiinnarneqarnissaanut aalajangiusimaneqarnissaanullu tunngaviuvoq, aammalu issittumi ilisimatusarnikkut piginnaasat pigiinnarneqarnissaannut” – taama oqaaseqarpoq Pinngortitaleriffimmi pisortaq Klaus Nygaard.

Naalakkersuinikkut oqaloqatigiinnerit saniatigut Naalakkersuisut taakkua marluk peqatigiillutik pulaarpaat Pinngortitaleriffik, Silaannaap Pissusaanut ilisimatusarnermi qitiusumik ingerlatsivik aamma Ilisimatusarfik. Danskit naalakkersuisuat ilaatigut paasissutissinneqarpoq nunatsinni ingerlaqqiffiusumik ilinniartitaanerit ilisimatusarnerlu pillugit, kiisalu kalaallit isummersuutaannik paasissutissinneqarluni danskit issittumi ilisimatusarnermut tunngasunik ingerlatsinerannut atatillugu, - taanna 2016-imi naammassineqartussatut naatsorsuutigineqarmat. Ingerlatsiviit taakkua marluk pingaartillugu oqaatigaat pingaaruteqartoq danskit aamma nunani allamiut ilisimatusartut Kalaallit Nunaanni najuunnissaat, ingerlaavartumillu ilinniartitaanikkut ilisimatusarnikkullu suleqatigiinnerup nukittorsarneqartuarnissaa.

Ulloq naggaserlugu Nuup Kangerluani umiatsiamik angalaartoqarpoq, tassanilu Silaannaap pissusaanut ilisimatusarfiup imaani ilisimatusarnermut tunngasumik suliami ilaat takutippaat.

 

Annertunerusunik paasissutissarsiniaraanni attavigineqassaaq:

Naalakkersuisup allattaa Eqaluk Høegh

eqah@nanoq.gl

+299 345702