Biilinik innaallagiamoortunik immiisarneq pisariitsuussaaq

Biilinut benziinatortunut dieselitortunulluunniit taarsiullugu biilinik innaallagiamoortunik toqqaasarneq Naalakkersuisut pisariinnerulersinniarpaat pilerinarnerulersinniarlugulu. Taamaattumik aasap ingerlanerani Nuummi inissiarsuit pingasuusut eqqaanni immiisarfinnik misiliillutik ikkussuiniarput. Aamma Nuup qeqqani immiinasuarfissamik ikkussisoqassaaq.

Nunatsinni biilinut innaallagiamoortunut inissiarsuarni, ataatsimoorussanik biilinut unittarfilinni najugaqaraanni immiinissamut periarfissanik amigaateqarneq akimmisaarfiit annerit ilagaat. Illuinnarni illunilu uiguleriinni najugaqartut silami ikkuffinnik atuisarput. Kisiannili inuit inissiarsuarni najugallit, ajornaatsumik ikkuffinnik pissarsisinnaanngitsut amerlapput. Assersuutigalugu Nuummi inissiarsuit inissiaatit tamarmiusut 70 procentii sinnerlugit amerlassuseqarput.

Innuttaasut inissiarsuit ilaanni najugaqartut portusuumiit igalaakkut ledninginik biilimik innaallagiamoortut, biilit unittarfianniittut tungaannut ningitsisalersimapput. Tamanna arlalinnik peqquteqartumik naleqqutinngilaq, taamaattumillu innuttaasunut, inissiarsuarni najugaqartunut immiiffissanik iluameersunik piaarnerpaamik pilersuisoqartariaqarpoq. Taamaattumik aasap ingerlanerani suliniummik ingerlatsisoqassaaq, tassanilu Nuummi inissiarsuit pingasut eqqaanni immiiffissanik ikkussisoqassaaq. Taamatuttaaq Nuup qeqqani immiinasuarfissamik ikkussisoqassaaq.

Uanga nammineerlunga biilinik innaallagiamoortunik atuisuuvunga naammagisimaarinnittoq, aammalu inuit suli amerlanerusut biilinik innaallagiamoortunik atuilernissamut pitsaanerusunik periarfissaqalernissaat nuannaarutigaara. Suliniut Kalaallit Nunaata minguinnerulernissaanut aqqutissiueqataavoq”, Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko oqarpoq.

Biilinut benziinatortunut dieselitortunulluunniit taarsiullugu biilinik innaallagiamoortunik toqqaasarneq Naalakkersuisut pisariinnerulersinniarpaat pilerinarnerulersinniarlugulu. Benziinamut dieselimullu taarsiullugu innaallagissamik atuilernissaq Kalaallit Nunaata minguinnerulernissaanut aqqutissaavoq. Biilit innaallagiamoortut biilinit akuersaarneqartunit iluaqutissartaqarnerupput. Pujoralannik peqqissutsimut ulorianaatilinnik annikinnerujussuarnik aniatitsisarput, tamannalu silap pissusianut ajoqutaannginnerujussuuvoq.

Nuummi inissiaqarfinnit pingasuusunit misilittakkat ataavartumik aaqqiissutissamik nassaarniarnissamut atorneqassapput, taamaalillunilu illoqarfinni erngup nukinganik atuiffiusuni arfinilinni tamani biilinik piginnittut immiiffissanik pitsaasunik neqeroorfigineqarsinnaalissapput.

Annertunerusumik paasisaarusunnermi Naalakkersuisup allattaa Elise Uupi Kuitse, +299 34 54 14-imut, e-mail: eukl@nanoq.gl, imaluunniit immikkoortortaqarfimmi pisortaagallartoq Camilla Østbirk, +299 34 60 19-imut, e-mail: caos@nanoq.gl, attaveqarfigineqassapput.