Vittus Qujaukitsup Danmarkimi ataatsimiinneri

Vittus Qujaukitsup junip 6-7-ani 2016 ataatsimiinneri

Inuussutissarsiornermut, Sulisoqarnermut, Niuernermut Nunanullu Allanut akisussaaffigalugit Naalakkersuisunut ilaasortaq Vittus Qujaukitsoq ulluni junip arferngani arfineq aappaannilu Danmarimi ataatsimeeqateqarpoq. Marlunngornermi juni arfineq aappaanni Vittus Qujaukitsoq-p illersornissamut ministeri Peter Christensen ataatsimeeqatigaa. Ataatsimiinnermi qallunaat Kalaallit Nunaanni illersornissakkut suliaqarnerata annertusarneqarnissaat immikkut ukkatarineqarpoq.

Kalaallit Nunaanni illersornissamut sulianik ingerlatsineranut nukittorsaanissaq pillugu nalunaarusiorluni sulineq annertooq danskit illersornissamut ministeriaqarfiata Namminersorlutik Oqartussat suleqatigalugit 2013-mi aallartinneqartoq  naammasisarneqarpoq. Ataatsimut nalunaarusiornermi  angusat siulliit ingerlanneqarsimalereerput, tassani Illersornissamut Paasititsiniaanerit 2015-mi qallunaat illersornissaqarfianit Naalakkersuisut suleqatigalugit siullermeersumik Kalaallit Nunaanni illoqarfinni arlalinni ingerlanneqarlutik.

Vittus Qujaukitsoq ima oqaaseqarpoq:

"Kalaallit Nunaanni siunissami imartat nakkutigineqarnerinut annaassiniarnernullu sullissineq nalunaarusiorluni sulinermi annertuumik pitsanngorsarneqartoq immikkut pingaaruteqarpoq, taamaalilluni Kalaallit Nunaata imartaani pisut annertusiartuinnartut isumalluuteqarnikkut nalimmassarneqassammata. Naalakkersuisut tungaannit sumiiffinni innuttaasut ilaatinneqarnissaat, Kalaallit Nunaannilu innuttaasut issittumi illersornissamut ilinniartitsinermi nutaami peqataatinneqarnissaannut, tassani danskit illersornissamut sulineranni, ilaatigut umiarsuarni nakkutilliissutini minnerunngitsumillu Siriusimi nakkutilliilluni sulinermi annertunerusumik periarfissaqarnerulernerisigut politikkikkut annertuumik piumassuseqarput."

Ataasinngornermi junip arferngani Vittus Qujaukitsoq nalliuttorsiorpalaartumik sorsuuteeqqamik Iver Huitfeldt-mi tunniussinermi peqataavoq, tassani qallunaat illersornissaqarfiata qulimiguullit MH-60R Seahawk qulingiluaasunit siulleq pisortatigoortumik tigummassuk, taakkulu taarsissavaat maanna pisoqalisimasut umiarsuarni sorsuutini qulimiguuliusut Lynx-it.

Tunniussinermi Ataqqinartoq Kunngissaq ataqqinaammik qaaqqusaralugu sillimaniarnermut ministeri Peter Christensen oqalugiarpoq. Qulimiguulik nutaaq ungasinnerusumut ingerlasinnaanermi saniatigut kisitsisinnaaneruvoq minnerunngitsumillu Kalaallit Nunaanni inuit angallatinit umiusunit nassaariniarnissaat qulimiguulinnit Lynx-nut sanilliullugit pitsanngoriaateqassaaq.

Qallunaat illersornissaqarfiata qulimiguullit pingasut tigusimalerpaat, kingulliillu arfinillit 2018 aasaanerata tungaanut tunniunneqartarnerat ingerlassalluni.

 

Annertunerusumik paasisaqarusukkuit attavigiukt: Nunanut Allanut Pisortaqarfiup Pisortaa Kai Holst Andersen +299 553331 / Naalakkersuisut Allattaa Helene S. Pedersen hspe@nanoq.gl