Qaanaami misileraalluni aalisarneq

Aalisarnermut, Piniarnermut Nunalerinermullu Naalakkersuisoq, Nikolaj Jeremiassen, aalajangerpoq Qaanaap eqqaani aalisarnermik misileraasoqassasoq. Aalisarnermut, Piniarnermut Nunalerinermullu Naalakkersuisoqarfik Qaanaami inuussutissarsiutit pillugit januaarip 21-anni aamma 22-anni isumasioqatigiittoqarmat peqataatitaqarpoq. Piniarnermik inuussutissarsiorneq ullumikkut qaangerniagassaqarpoq imaannaanngitsunik, soorlu aamma Qaanaami piniartut aamma taama atugaqartut.

Qaanaap eqqaani aalisarnermik periarfissarpassuaqarpoq maannamut suli atorluarneqanngitsunik. Inuussutissarsiornissamut periarfissat taakku piniartullu aalisalernissamut piumassuseqarnerujussuat tunngavigalugu pinngitsoorneqarsinnaajunnaarpoq Qaanaap imartaata misissuiffigineqarnissaa.

Misileraalluni aalisarneq aalisarnertut nassuiaassutigineqarsinnaasoq arlalinnik siunertaqarpoq

 

  • aalisakkat ilisimaneqanngitsut misissussallugit
  • imartat misissuiffigineqarsimanngitsut misissussallugit
  • aalisariaatsit nutaat aalisaassutillu aamma nutaat atorlugit aalisarnermik misileraaneq

 

Imartani misissuiffigineqarsimanngitsuni misileraalluni aalisarneq:

 

Aalisakkat: Qalerallit, saarulliit, nataarnat aamma aalisakkat allat Qaanaap sineriaata qanittuani aalisakkat

Aalisarnermi ningittakkat, qassutit, pullatit aamma qassutit nunamit pitunneqarsimasut atorneqarsinnaapput. Aalisarneq imartami sinerissamiit aamma titarnerup aalisarnikkut oqartussaaffigisamut tunngaviusumik killigititamit sømilit pingasut avataanut pissaaq.

Aalisariutit akuersissummik tunineqartut aalisariutinik mikinerusunit tunitsivittut aamma atorneqassapput. Ingerlatseqatigiiffiit qinnuteqartut Naalakkersuisoqarfimmut aalisarnissaminnut pilersaarutigisartik ilanngutissavaat. Pilersaarummi nassuiaassutigineqassaaq ingerlatseqatigiiffiup imartaq qanoq annertutigisumik siaruarsimatigisoq misileraaffigissallugu.

Qinnuteqareernermi misileraanissamut akuersissummik tunniussisoqassaaq. Misileraanissamut akuersissutit taamaallaat nunatsinni ingerlatseqatigiiffinnut tunniunneqassapput. Aalisarnermut atatillugu Pinngortitaleriffimmit aamma Aalisarnermut, Piniarnermut Nunalerinermullu Naalakkersuisoqarfimmit ilitsersuutinik ilanngussisoqassaaq. Misileraalluni aalisarnerup kingorna nalunaarusiortoqassaaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. Mail: emanuel@nanoq.gl

Qinnuteqarfissaq uani pineqarsinnaavoq:

http://www.businessingreenland.gl/kl-GL/Fiskeri,-Fangst-og-Landbrug/Fiskeri-og-fiskerikontrol/Fiskeri/Artikelside