Qaasuitsup Kommunianit maanna kommunip avinneqarsinnaanera pillugu ersarissumik siunnersuuteqarnissamut tunngavissaq inissinneqarpoq.

Naalakkersuinikkut Ataqatigiissaarisoqatigiit (KANUKOKA´p siulittaasua, borgmesterit sisamaasut aamma Naalakkersuisut) 6. juni 2016-imi ataatsimiinnerminni Qaasuitsup Kommuniata avinneqarsinnaanera, 2017-imi ataatsimoortumik tapiissutissat kommuninullu suliassanik siunissami nuussinissanut tunngaviit oqallisigaat. Suliffeqarfiit siammarlugit inissinneqarusunnerat ilanngullugu oqallisigineqarpoq.

Naalakkersuinikkut Ataqatigiissaarisoqatigiit 16. februar 2016-imi ataatsimiinnerminni aalajangerput Qaasuitsup Kommuniata avinneqarnerata kingunerisinnaasai misissueqqissaarinissaq aallartinneqassasoq, sammineqartumut tunngatillugu nalunaarusiap 2015-imi suliarineqartoq malitseqartinniarlugu, aamma kommunit aaqqissugaanerat pillugu siunissami oqallinnissani tunngavissat pissarsiarineqaqqullugit. Misissueqqissaarineq BDO-mit suliarineqarsimasoq maanna suliarineqareerpoq Naalakkersuinikkullu Ataqatigiissaarisoqatigiinnullu saqqummiunneqarsimalerluni. 

Qaasuitsup Kommuniani kommunalbestyrelsimit nalunaarusiat oqallisigineqarnissaat tamatumalu kingornatigut Naalakkersuisunut inassuteqaasiornissaat isumaqatigiissutigineqarpoq, Naalakkersuisullu tamatuma kingornatigut Inatsisartunut aalajangiiffigisassatut siunnersuusiussallutik.

Kommuninut suliassanik nuussinissaq siuarsarniarlugu ilaatigut sanaartornermi suliassat immikkoortullu akimorlugit assigiimmik sulisoqarnissaa qulakkeerniarlugu, 2017-imi ataatsimoortumik tapiissutinik suliaralugit aallartinnginneranni ataatsimut tunngavissanik akuersinissaq pisariaqartutut nalilerneqarpoq.

Namminersorlutik Oqartussat paaqqinnittarfiutaannik suliffeqarfiutaannillu nuussinissaq pillugu kommunit nalunaarusiarititaannut tunngatillugu suleqatigiissitami peqataanissartik Naalakkersuisut ilanngullugu neriorsuutigaat. Suleqatigiissitaq juli qaammat naatinnagu sulinissamut suliakkiissummik siunnersuuteqassaaq.

 

Nuuk, ulloq 6. juni 2016

Kim Kielsen, Naalakkersuisut Siulittaasuat

Palle Jerimiassen, KANUKOKA-p Siulittaasua

Jørgen Wæver Johansen, Kommuni Kujallermi borgmesteri

Asii Chemnitz Narup, Kommuneqarfik Sermersuumi Borgmesteri

Hermann Berthelsen, Qeqqata Kommuniani Borgmesteri

Ole Dorph, Qaasuitsup Kommuniani Borgmesteri