Taamaammat Aasianni silaannaq minguinnerulissaaq

Aasiaat havn

Naalakkersuisut nuna tamakkerlugu pitsaanerusumik nungusaataannginerusumillu eqqagassalerinissaq ingerlaavartumik sulissutigaat. Pinngortitamut, Avatangiisinut Nukissiuuteqarnermullu Naalakkersuisoq 20. maj 2016-imi tusagassiortunik katersortitsinermini nalunaaruteqarpoq, kommunini eqqagassalerinermut aaqqiissutissanut pitsaanerusunut tapiissutitut 11 mio. koruunit tunniunneqartut. Aningaasat kommuninut assigiinngitsunut, aammalu illoqarfinnut nunaqarfinnullu siammarlugit agguaanneqassapput.

Aningaasanit taakkunannga amerlasuut Aasianni ikuallaaviup pitsanngortinneqarnissaanut tutsinneqassapput, taamaalilluni siunissami pujoq pitsaanerusumik salinneqartalissalluni. Putsup pitsaanerusumik salinneqartalernissaa, saviminissanik oqimaatsunik dioxininillu aniatitsinermik killilersuinissamut alloriarnerussaaq pingaarutilik. Dioxin akuutissaavoq, inuit pilersitaasa ulorianarnerpaat ilaat, aammalu hormoninut akornutaasutut kræftilersitsisartutullu pasineqartoq. Taamaattumik kommunit ikuallaavinnit mingutsitsinermik killilersuiniarneranni ikiorneqarnissaat Naalakkersuisunut pingaaruteqarpoq.

-”Matumani Naalakkersuisut Qaasuitsup Kommunia peqatigalugu pingaarutilimmik alloriarput. Aasianni ikuallaavimmi pitsannguinernit misilittakkat kingusinnerusukkut nuna tamakkerlugu iluaqutigineqassapput. Silaannaap najuussortakkatta sapinngisamik minguinnerpaanissaa tamatta tatigisariaqarparput. Taamaattumik kommunit peqatigalugit eqqagassalerinermi putsumik saliisarnerup pitsaanerulernissaanut ineriartortitseqqinnissarput pingaaruteqarluinnarpoq”, Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko oqarpoq.

Qaasuitsup Kommuniata Aasianni ikuallaavik pigisaraa ingerlataralugulu, aammalu kommuni ikuallaavimmik pitsannguinissamut pilersaarusiortitsisuuvoq. Aasianni piorsaanissaq Naalakkersuisut putsup gassiata akuinik ulorianaatilinnik, dioxininik saviminissanillu oqimaatsunik  saliisarnissamut anguniagaqarnerannik naammassinniffiusussat siullersarissavaat.

Kommunip tapiissutai 6,7 mio. koruuniusut pitsannguinissanut tamanut matussusiissanngillat. Qaasuitsup Kommunia nammineerluni ikuallaaviup piorsarneqarnissaanut 2,3 mio. koruunerpianik aningaasaliissaaq.