Inuit suli amerlanerusut suliffissarsinissaat soqutigineqarluarpoq

Sunaana aqqutissaasoq innuttaasut suli amerlanerusut pisortanit pilersorneqarunnaarlutik suliffissarsinermikkut imminnut pilersulersinnaanissaat, taamaasillutillu namminneq, ilaquttatik, suliffeqarfiit nunattalu napatinniarneqarneranni ikorfartueqataasinnaanngorlutik?

Tamanna tunngavigalugu Ilaqutariinnermut Naligiissitaanermut, Isumaginninnermut Inatsisinillu Atuutitsinermut Naalakkersuisoq Martha Lund Olsen suliffeqarfinnik, Nunatsinni Inuussutissarsiuteqartunik, CSR-imik, kommuninik, Namminersornerusut suliffeqarnikkut immikkoortortaqarfianik allanillu paasissutisseeqatigiinnissaq oqaloqatigiinnissarlu siunertaralugu aggersaasimavoq, neriuutigalugu taamaasiornikkut suliffissaa-leqisut arlaatigut tapiissuteqarnikkut (akunnattumik oqinnerusunillu suliaqartinneqarsinnaanissaanut) periarfissaat annertusaavigineqarsinnaassasut.

”Ilisimavarput siusinaartumik sulisinnaajunnaarnersiuteqartut ilarpassui suliffeqalerusukkaluartut, soorlu ulloq naangikkaluarlugu piffissami akunnattuni ikiortitut il.il. sulilersinnaanissartik kissaatigisaraluaraat. Tamanna tunngavigalugu pisortat tungaanniit aqqutissiuusseqataaniarpugut sulilersitsiniaasarnerni tapiissuteqartarnikkut. Taamatut aaqqissuussinerup siunertarivaa qanoq iliorluta siusinaartumik sulisinnaajunnaarnermut maleruaqqusat nutaat atuutilernerini, kommunit suliffeqarfiillu akornanni amerlanernut inissaqartitsilluta sulisitsilersinnaanissarput. Taamaattumik nuannaarutigaara, suliffeqarfiit taamak amerlatigisut ataatsimeeqatigiinnissamut soqutiginnimmata. Tamatumuu-nami ersersinneqarmat inuit suli amerlanerusut nammaqataanissaat kissaatigineqartoq – taamaasiornikkullu imminnut, ilaqutarisat, suliffeqarfinnut inuiaqatigiinnullu iluaqusiissallutik.”  taamak aaqqissuussisoqarnissaanut tunngatillugu oqaaseqarpoq Ilaqutariinnermut Naligiissitaanermut, Isumaginninnermut Inatsisinillu Atuutitsinermut Naalakkersuisoq Martha Lund Olsen.

Siusinaartumik sulisinnaajunnaarnersiutit nutaat 1. juli 2016-miit atuutilissapput

Ulloq 1. juli 2016 siusinaartumik sulisinnaajunnaarnersiutit nutaat atuutilissapput. Maleruagassat tamakku ilaatigut kingunerisussaassavaat, siusinaartumik sulisinnaajunnaarnersiuteqartut akornanni suli sulisinnaassuseqartut periarfissinneqassammata suliffeqarfinnut attuumassuteqaannarnissamut, soorlu immikkut tapiissuteqarfiusunut suliffissarsinermikkut (akunnattumik oqinnerusunillu suliaqartinneqarsinnaanissaanut) periarfissaat annertusaavigineqassammata. Siusinaartumik sulisinnaajunnaarnersiuteqartut ilarpassuisa sulisinnaassusertik nalilersittalertussaavaat, aamma sulileqqinnissamut sungiusartinneqartassallutik taamaasillutillu suliffittaarnissamut periarfissaginnerulissallutik.

Paasisaqarnerorusukkuit attaveqarfigiuk Søren Thestrup, oqarasuaat 56 54 06 aqqutigalugu.