Tiinannguaq Lyberth iPad-imik eqquisuuvoq

Sooruna nuuttoqartartoq, aamma sooruna nuuttoqarneq ajortoq? Apeqqutit taakku, Nuna tamakkerlugu Pilersaarusiornermut Immikkoortortaqarfiup Aningaasaqarnermut Naalakkersuisoqarfiup ataaniittup maajimi voxpop-imik misissuigami akissutiserusussimavai. Inuit 1.600-t misissuinermi peqataapput, tamannalu iluatsittupilussuartut taaneqarsinnaavoq

Tiinannguaq Lyberth iPad-imik eqquisuuvoq, iPad-erlu Randi Vestergaard Evaldsen-ip, Aningaasaqarnermut Aatsitassanullu Naalakkersuisup Tiinannguamut tunniuppaa. Aningaasaqarnermut Naalakkersuisoqarfiup nuuttarneq pillugu voxpop-imik misissuinerani, inuit 1.000-ingajaat atiminnik paasissutissiisimasut akornanni eqquisup aqqa makinneqarpoq. Apeqqutinik akisassanik akisimasut katillugit 1.600-ngajaapput.

"Apeqqutinik akisassanik misissuinerup tapersersorneqarnerujussua assut nuannaarutigaara. Tamatuma takutippaa sammisaq annertuumik soqutigineqartoq", taama oqarpoq Randi Vestergaard Evaldsen, Aningaasaqarnermut Aatsitassanullu Naalakkersuisoq, taassuma amerlasuunik akissuteqartoqarsimanera pissutigalugu misissuineq iluatsilluartutut isigaa.

iPad-imik eqquisoq 38-nik ukiulik ullumikkut ilaquttanilu Nuummi najugaqarput.

Tiinannguaq meeraallunili nuuttarsimaqaaq, tamatumunngalu atatillugu illoqarfinni assigiinngitsuni arlalinni najugaqartarsimalluni. Qaqortumi inunngorpoq Uummannamilu peroriartorluni. Tiinannguaq inersimasunngorami, Ittoqqortoormiini, Maniitsumi, Ilulissani kiisalu ullumikkut Nuummi aamma najugaqartarsimavoq.

"Siullermik 1993-imi Nuummut nuuppugut, taamani ilaquttama pitsaanerusumik atuarnissannut ilinniarnissannullu periarfissaqartikkusuppaannga. Aalajangiineq taanna ullumikkut nuannaarutigaara", Tiinannguaq Lyberth oqaluttuarpoq nangillunilu:

"Arlaleriarlunga Nuummi najugaqartarsimavunga, illoqarfiillu pingaarnersaannut 2013-imi nooqqippugut. Taamani isumaqatigiippugut, ilinniaqqinnissannut piffissanngortoq. Maannakkullu suliffima saniatigut, Ilisimatusarfimmi isumaginninnermi siunnersortitut najugaq qimannagu ilinniagaqarpunga".

Eqquisup qularutiginngilaa iPad-itaartik ilaqutariinni atprluarneqartarumaartoq. Tiinannguaq uinilu pingasunik paneqarput, angajullerlu apersorteqqammerpoq.

Voxpop-imik misissuineq pillugu paasissutissat:

  • Inuit 1.590-it internetikkut apeqqutit atorlugit misissuinermut peqataasimapput. Taakku Kalaallit Nunaanni najugallit kiisalu Danmarkimiittut Kalaallit Nunaannut attuumassutillit 2%-iisa missaanniipput.
  • Akisut akornanni arnat 53 %-iupput angutillu 47 %-iullutik.
  • 65,4 %-ii Kalaallit Nunaanni najugaqarput, 31,5 %-it Danmarkimi kiisalu 3,1 %-it nunani allani najugaqarlutik.
  • Nuuttarneq pillugu misissuinermut annertunerusumut ukioru pisussamut tunngaviliivoq.

 

Inussiarnersumik Inuulluaqqusillunga

Randi Vestergaard Evaldsen
Aningaasaqarnermut Aatsitassanullu Naalakkersuisoq

 

Paasisaqarnerorusuttut attavigisinnaavaat Martin Christiansen, oqarasuaat +299 34 56 51 imaluunniit e-mail mchr@nanoq.gl.