Aalisariaaseq aalisartumut nukersornarpallaanngitsoq

- Neriuutigaara Royal Greenlandip Maniitsumi saarullinnik umiarsuarni uumatitseriarluni kingumut tunisassiuleqqinnera iluatsilluassasoq, soorlu ukiuni kingullerni marlunni taama aaqqissuussilluni tunitsiveqartitsisartoq, Aalisarnermut, Piniarnermut Nunalerinermullu Naalakkersuisoq, Nikolaj Jeremiassen oqarpoq.

Aalisarnermut, Piniarnermut Nunalerinermullu Naalakkersuisoq, Nikolaj Jeremiassen, Royal Greenlandip Maniitsumi saarulliit uumateriarlugit tunisassiarisarnerinut najuulluni sapaatip akunnerani kingullermi malinnaavoq. Takuniaatitsinermut Royal Greenland aaqqissuussisuuvoq.

Royal Greenland Maniitsup eqqaani umiarsuarnik saarullinnik uumatitsiviliilluni, saarullinnik  uumasunik tunitsiveqartitsisarluni ukiuni kingullerni suliniuteqarpoq.

Saarulliit bundgarnini pisarineqarsimasut qassutingaatsiarsuarnut,  uumatitsiviusunut nuunneqartarput, ulluni arlalinni taakkunani uninngateriarlugit umiarsuarmut milluarlugit aamma nuunneqartarlutik. Umiarsuup Maniitsuliaattarpai, tulaannartoq Maniitsup tunisassiorfiani  tunisassiarineqalersarlutik. Misilittakkat takutippaat saarulliit bundgarnersornermit nerpiginnerullutik tunisassiarineqartartut.

Arlalissuarnik pitsaaqquteqarpoq

-  Neriuutigaara suliniutigineqartoq siunissami iluatsilluarumaartoq. Aalisariaaseq nutaaq aalisartunut pitsaaquteqarpoq. Aalisartumut nukippassuit atorneqarunnaassapput, bundgarnersornermit assoroornannginnerulluni, Aalisarnermut, Piniarnermut Nunalerinermullu Naalakkersuisoq oqarpoq.

Aalisartup piffissaq nukissarlu saarulliit niaquarnerinut erlaviiarnerinullu atussanngilai.

- Aalisartup qanoq amerlatigisunik aningaasarsiaqassanerluni siumugaaq naatsorsuutigilersinnaassavaa. Tunisinissamut killilersuisarnerit akuttunerulissapput.  Bundgarnersorluni aalisarneq sivisunerulissaaq, Nikolaj Jeremiassen oqarpoq erseqqissaallunilu suliniutigineqartoq Maniitsumi suliffissuarmut amerlasuunnik sulisoqalernermik kinguneqarsimasoq.

Aalisartut 38–t umiarsuarmut milluaassutilimmut ullumikkut tunisisarput.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl