Tasiilarmiut oqalliseqataalluartut

Sapaammi junip 5.-ani Tasiilap katersortarfiani ataatsiniit pingasut tungaanut – piffissamik atuilluarlutik inuit 40-t sinnerlugit soqutiginnillutik Ilaqutariinnut, Naligiissitaanermut, Inunnik Isumaginninnermut Inatsisinillu Atuutsitsinermut Naalakkersuisoq Martha Lund Olsen innuttaasunut ataatsimiitsitsimmat peqataapput.

Tasiilamut tikeraarnermut tunuliaqutaavoq Suliassaqarfinnik Nakkutilliisut Tasiilami Isumaginnittoqarfik pillugu nalunaarusiaq saqqummeqqarmermassuk, imatullu oqarpoq:

”Nakkutilliinermut nalunaarusiaq tigoqqammerpara, taassumunngalu atatillugu pingaartippara Tasiilami innuttaasut oqaloqatigissallugit, taamaasillunga ulluinnarni atugarisaannik tusarfigalugit.”

Akunnerit marluk ingerlaneranni apeqqutit 40-t tungaanut saqqummiunneqarmata innuttaasunit  soqutiginnilluarneq ersersinneqarpoq. Taamaasillutik qulequtaritinneqartut ”Meeqqanut 2016-mi suliniutit”, siusinaartumik pensionisiat, isumaginninnerup aqunneqarneranut aaqqissuusaaneranullu inatsisitaaq kisiisa eqqartornagit, najugarisami atugarisat aamma sammineqarput.

Annermik innuttaasunut sullissineq pitsaanerulertariaqartoq oqariartuutaavoq.

Atukkat pisortanut attaveqarniarnerit, sumut saaffiginniffissaaruttarnerit pisortanullu saaffiginnissutit akissutissaaruttarneri, pitsanngorsaavigineqarnissaat assut ujartorneqarpoq.

Allat inuunermi atugarisat aamma sammineqarput; meeqqat atugarisaat, meeqqanik inissiisarnerit, angajoqqaarsiaasarneq, katsorsartittarnerit, inuuniarnermilu aningaasartuutit illumut, kiassarnermut minnerunngitsumillu nerisassat akiinut naliginnarmik malinnaaniarneq.

Ilanngullugu inunnik isumaginninnermi sulisussaaleqinermi najukkami ilinniaqqissinnaanermi periarfissaasut angutinit soqutigineqarput.

Ernumanartunik oqallittoqaraluartoq,  eqqissisimasumik  uummaarissumillu ataatsimiinneq ingerlavoq. Naggataasumillu neriulluarnartortalimmik Tasiilarmiumit oqaasertaliisoqarmat;  ”Tasiilaq sapinngilaq” - ataatsimiigiaqataasunit ersaattaannermik innuttaasunut ataatsimiinneq naammassineqarpoq.