Avaleraasartoortassat pillugit peqquserluttuliortoqanngilaq

Partii Naleqqap siulittaasua Hans Enoksen nittartakkakkut nutaarsiaqartitsivimmut Sermitsiaq.AG-mut ataasinngornermi juunip arfernanni oqarpoq Aalisarnermut, Piniarnermut Nunalerinermullu nunatsinni ingerlatsiviit namminneerlutik aalisariutaateqanngitsut ukioq manna avaleraasartoorniarnissaannut maajip 31-anni makitsisoqarmat peqquserlussimasoq.

Naalakkersuisoqarfimmit erseqqissaassutigiinnassavarput makitsisoqarmat peqquserluttoqanngimmat. Hans Enoksen Sermitsiaq. AG-mut oqarpoq 'akuersaarneqarsinnaanngitsumik tupinnarluinnartumillu pisoqarfiunera'.

Tamanna Naalakkersuisoqarfimmit kingumut erseqqissaassutigiinnassavarput  taamaattoqanngilluinnarmat.

Ingerlatseqatigiiffiit 12-it qinnuteqarsimasut namminneerlutik aalisariuteqanngitsut makitsinermi peqataasut nunatsinneersuupput. Makitsineq pisariaqalerpoq ingerlatseqatigiiffiit  arfiniliinnaat   aalisarsinnaammata.

Ingerlatseqatigiiffiit januaarip aallaqqaataa 2016 nallertinnagu pilersinneqareersimasussaapput, aalisarnermillu imaluunniit aalisakkanik tunisassiornermik qangalili ingerlatsisuussallutik, avaleraasartoorniarnerup saniatigut.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl