Qaqortumi imeqarfimmut killeqarfimmut maleruagassat nutaat

Killilersuinernit, siornatigut Qaqortumi imeqarfiup killeqarfianut atuutsinneqartunit amerlasuut Naalakkersuisunit sakkukillineqarput

Qaqortumi taseq imeqarfik, Tasersuaq, illersorniarlugu imeqarfimmut killeqarfik pilersinneqarsimavoq. Qaqortup ilarujussua imeqarfiup killeqarfiata iluaniippoq, taamaattumillu suliassanit amerlasuut imeqarfimmut killeqarfiup iluani inerteqqutaanerat illoqarfimmi ulluinnarni inuunermut amerlasuunik unammilligassaqartitsivoq. Assersuutigalugu illunik sananissaq isaterinissarlu, aqquserniornissaq, suliffeqarfinnik inuussutissarsiutinik ingerlataqartunik ingerlatsinissaq, uuliamik ikummatissamik uninngasuuteqarnissaq aammalu assartuutinik atortunillu motoorinik ingerlatilinnik atuinissaq inerteqqutaavoq.

Nukissiorfiit Qaqortumi imilerivimmi aamaruutissanik issingersuummik ikkussinerisa kingorna, imilerineq isumannaatsigilersutut nalilerneqarpoq, allaat illoqarfimmi killilersuutit arlallit sakkukillineqarsinnaallutik.

Nalunaarutip nutaap atuutilerneratigut, imeqarfiup killeqarfiup iluani killeqarfiit illersuiffissat nutaat pilersinneqassapput.

  • Killeqarfik 0 Tasersuaq sinerlugu tatsip sinaani killeqarfiuvoq 30 meterinik takissusilik, tassanilu suli illunik nutaanik sanaartortoqaqqusaanngilaq. Illut pioreersut allanngortiterneqarsinnaapput aamma/imaluunniit allilerneqarsinnaallutik.
  • Killeqarfik 1 inissiaqarfiuvoq, imileriviup arsaattarfiullu akornanniittoq. Tassani illuliortoqarsinnaalissaaq, inuussutissarsiutinik oqinnerusunik ingerlatsisoqarsinnaalissaaq aammalu assartuutinik atortunillu motoorinik ingerlatilinnik atuisoqarsinnaalissalluni.
  • Killeqarfik 2 Tasersuup kujataani ujaqqeriviup eqqaani inuussutissarsiutinik ingerlataqarfiuvoq. Nalunaarummi suliffeqarfiit inuussutissarsiutinik ingerlataqartut 2020 nallertinnagu kussinermik, erngup nunap qaavaniit kuummut, Tasersuarmik imaarsaaviusumut toqqaannartumik kuuffissamik sanasinnaagunik uninngaannarsinnaanerinut periarfissiisoqarpoq.
  • Killeqarfik 3 imeqarfimmut killeqarfiup sinneraa. Nalunaarummi tassani inerteqquteqarneq atuuttoq allanngortinneqanngilaq. Kisiannili imeqarfimmut killeqarfiup iluani sisorartarfimmi majuartaatilimmi illiniliornissaq ajornarunnaassaaq.

Kiisalu killeqarfik 0-imi aamma 1-imi uuliamik ikummatissamik, inissianik kiassaanermut atorneqartussamik uninngatitsinissaq inerteqqutaajunnaassaaq. Tasersuup mingutsinneqannginnissaa qulakkeerniarlugu kommunip siunissami killeqarfiup iluani uulianut ikummatissanut tankinik tamanik nakkutilliinini sakkortusissavaa. Aamma killeqarfik 0-imi 1-imilu illut tamarmik 2020 naatinnagu pisortat kuuffeqarfiinut atassuserneqarsimanissaat kommunip isumagissavaa.

Sukumiinerusumik paasissutissarserusunnermi attaveqarfigiuk Naalakkersuisoqarfimmi pisortaq, oqarasuaat: +299 345122 imaluunniit e-mail: mesp@nanoq.gl