Upalungaarsimasut tunniusimanerujussuat nuannaarutigaa

Upalungaarsimanermut Naalakkersuisoq Mala Høy Kúko nersorinnippoq

Najukkatsinni upalungaarsimasut tunniusimanerujussuat, sungiusarnitsinni annertuumi Livex2016-imi naammasseqqammersumi takutitaat Upalungaarsimanermut Naalakkersuisutut nuannaarutigaara.

 

Arfininngormat, Nuup avataani umiarsuit marluk imminnut aportut nalunaarutigineqarmat sungiusarneq aallartippoq, tamatumalu kingorna annaassiniarneq avatangiisinillu suliaqarneq annertunerusoq ingerlanneqarpoq. Inuit 900-t sinnerlugit amerlassusillit sungiusarnissamut piareersaaqataapput ingerlatseqataallutillu. Naapitakka tamarmik annertoorsuarmik suliaqarput.

 

Sakkutuut Kalaallit Nunaanni upalungaarsimanermut sungiusarnermik annertuumik, najukkami upalungaarsimasunit aammalu kalaallit oqartussaasuinit arlalinnit, ilaatigullu annaassiniarnissamut upalungaarsimasunit (ulluinnarni qatserisartunik taaneqartunit) peqataaffigineqartumik ingerlatsisinnaasimammata Naalakkersuisunit nuannaarutigaarput.

 

Upalungaarsimaneq tassaavoq piareersimaneq, tassalu upalungaarsimaneq, aammattaaq nunarsuarmi  suut tamarmik siumut eqqoriaruminaaffianni. Upalungaarsimanermi sulisussat assigiingitsut ilungersunartunik pisoqartillugu suliassanik pitsaanerpaamik suliaqarsinnaanissaat qulakkeerniarlugu, ajornartoornermi aqutsinissamut sungiusarnerit pingaaruteqarput.

 

Nunatsinni upalungaarsimanermi unammilligassat asseqanngitsut, soorlu silap pissusia sakkortooq, sumiiffiit imminnut ungasissorsuit sulisutigullu killeqartut naammattoorneqartarput. Unammilligassat taakku oqartussaasunut annaassiniartartunullu, pisariaqartillugu ilaanneeriarlunilu pissutsit sakkortoorsuutillugit piffissap sivikitsuaqqap ingerlanerani piareersimasussanut immikkut piumasaqaateqarfiupput. Taamaattumik upalungaarsimanerup iluani sullissisut assigiinngitsut pisut annertuut pinerini erngerlutik isumaginnissinnaanersut, aammalu pinartoqartillugu suleqatigiissinnaanersut misilinniarlugu qulakkeerniarlugulu sungiusarnerit mannatut ittut pingaaruteqarput.

 

Taamaattumik Naalakkersuisunit nuannaarutigaarput, LIVEX 2016-imi sullissisut oqartussaasullu akimorlugit piginnaanerit pisariaqartut sungiusarneqarnissaat periarfissinneqarmat. Suleqatigiinneq ataqatigiissaarinerlu siumut aqqutissaapput, innuttaasut ulluinnarni isumannaassusaat aammalu ajunaarnersuaqarnissaa eqqarsaatigalugit. Ataatsimoorluni upalungaarsimanissaq kikkut tamarmik pisinnaasaminnik suliaqarlutik nukiit ataatsimut atorneqarnerisigut pilersinneqartarpoq.