John Kerry Danmarkimut Kalaallit Nunaannullu tikeraassaaq

Danmarkip nunanut allakut ministerianit Kristian Jensenimit Gamma Inuussutissarsiornermut, Suliffeqarnermut, Niuernermut Nunanullu Allanut Naalakkersuisumit Vittus Qujaukitsumit ataatsimoorussamik tusagassiorfinnut nalunaarut

Amerikami nunanut allanut ministeri John Kerry Danmarkimut aamma Kalaallit Nunaannut ulluni 16.-17. juni tikeraassaaq, nunanut allanut ministerimit Kristian Jensen-imit aamma Naalakkersuisumit nunanut allanut susassaqarfinnut akisussaasuusumit Vittus Qujaukitsumit qaaqquneqarluni. Tikeraarnermi  Issittoq, silap pissusaa, Syrien, ISIL, Ukraine aamma niuerneq pillugit suleqatigiinneq pingaartumik sammineqassapput.

Kristian Jensen oqarpoq: 

”Kingullermik Washington-imi nunat avannarliit-amerikamiut siuttuisa ataatsimiinneranni uppernarsaanitsitut USA-p aamma Danmark-p akornanni peqatigiinneq qanimut nukittuumillu ingerlavoq. Danmark aamma USA oqaluttuarisaanermit, kulturimit, oqartussaaqatigiinnermit aammalu naleqartitanit ataqatigiissinneqarput. Tamanna malitassanik oqaluuserisassanillu nutaanik aalajangersaanissamut atorluassallugu isumaqatigiissutigaarput. Assersuutigalugu ajortumeerinianik akiuiniarneq, killilersugaanngitsumik niuerneq aamma inuit pisinnaatitaaffiisa siammarsarneqarnerat pillugit suleqatigiinneq qanoq annertusarsinnaaneripput, Københavnimi John Kerry-mut oqaloqatigiissutigissavakka. Tikeraarneq Danmarkimik aammalu qallunaat inuiaqatigiinni ilusiliisimanerannik amerikamiunit soqutigineqartumut John Kerry misigisaqartinnissaanut aamma periarfissaassaaq”. 

Kristian Jensen oqarneratut tikeraarnerup USA-imik suleqateqarnerup pingaaruteqarnera erseqqissassavaa. 

”Aamma Issittoq pillugu qanimut suleqatigiippugut. Nuannaarutigaara Vittus Qujaukitsoq peqatigalugu John Kerry Kalaallit Nunaannut tikilluaqqusinnaagakku. Tassani silap pissusaata allanngoriartornera aammalu tamatuma Kalaallit Nunaannut unammilligassaqartitsinera nammineerluni takullugu maluginiassavaa”.

Vittus Qujaukitsoq oqarpoq: 

”John Kerry-p Kalaallit Nunaannut tikeraarnerani amerikamiut issittumut soqutiginnillutik aallussinerat erseqqissarneqarpoq. USA maannakkorpiaq Issittunut Siunnersuisooqatigiinnut siulittaasoqarfeqartitsivoq, tassani uagut aamma Issittumi innuttaasut taakkualu pisariaqartitaat aallullugit pilersitsiviulluartumik suleqatigiinnerup ingerlaqqinnissaa Kalaallit Nunaanni pingaartillutigu. Tikeraarnerup peqatigisaanik apeqquterpassuit Kalaallit Nunaata, Danmarkip aamma USA-p ataatsimoorlutik soqutigisaqarfigisaasa oqaloqatigiissutiginissaannut uagutsinnut periarfissiivoq, tassanilu aamma ilaavoq USA-mik illersornissaq pillugu suleqateqarneq”.


Paasisaqarnerorusuttut attavigisinnaavat Nunanut Allanut Pisortaqarfimmi pisortaq Kai Holst Andersen, oqarasuaat +299 553331 imaluunniit e-mail kaoa@nanoq.gl.