Peqqissunik meeraqassaagut – ullut tamaasa

Ullumikkut ullorsiutit 1. Juni takutippaa. Tamannalu isumaqarpoq Naalakkersuisut Meeqqanut ukiorititaanni Meeqqat Ulluat. Imaanngilarli ullumikkuinnaq imaluunniit ukiormannaannaq meeqqat pillugit ukkataqassasugut, matumani peqqissuunerat ilaliullugu. Ullummi tamaasa taamaattariaqarpoq.

Taamaattumillu pingaaruteqarpoq Kalaallit Nunaanni meeqqat peqqissusaat ataavartumik pitsanngoriartuaarnissaanik suliaqartuarnissaq. Tamanna Peqqissutsimut Naalakkersuisup Doris Jakobsen aalajangersumik oqaatigaa.

"Nuannerpoq meeqqat namminneq ullorititaat nalliuttorsiutigisinnaagatsigu. Ulloq angajoqqaanut meeqqanullu eqqaasitsissutaasinnaavoq, ilaqutariittut timi ullut tamaasa aalatilluartarnissaanut, ilaqutariinni pinnguarluni oqaloqatigiillunilu. Pitsaasut aammali ulluinnarni artornarsinnaasut oqaloqatigiissutigisinnaallugit. Inersimasut tamarmik akisussaaffeqarput meerartatta peqqissuunissaanik – ullut tamaasa. Taamaattumillu Peqqissutsimut Naalakkersuisoqarfik suliniutit immikkut ittut arlallit meeqqanut inuusuttunullu angusassanik toraagalinnik suliniuteqarpoq” taama oqarpoq Peqqissutsimut Naalakkersuisoq Doris Jakobsen.

Peqqissutsimut Naalakkersuisoqarfiup ukua meeqqanut inuusuttunullu 2016-mi suliniutit pilersitsiniarnerillu aallarnisareerpai aamma aallarnisarniarlugit:

  • Immikkut ittumik suliniuteqarnikkut meeqqat inuusuttuaqqallu tarnimikkut napparsimasumik angajoqqaalinnik ukkassinerusoqassaaq. Siunniunneqarpoq 2016-mi ukiap ingerlanerani tarnikkut nappaateqarneq pillugu takussutissiat atugassiallu meeqqat atuarfiinut tamanut agguaanneqarumaarput. Ataatsimut qulequtarineqarpoq “Oqaloqatigiissutigisiuk” kaammattuutaallunilu sammisaq  tarnikkut nappaateqarnerup paquminartinneqarnerata  unitsinneqarnissaa aammalu meeqqat oqaloqatigineqartarnissaasa pingaaruteqarnera – aamma ilaqutariit iluanni nappaatit pillugit.
  • Innutaasut peqqissuunissaannut suliniummut Inuuneritta-mut atatillugu nerisaqarnerneq pillugu ukiumut  anguniagaqarfiusumut atatillugu meeqqanut  inuusuttuaqqanullu peqqinnartumik nerisaqarnermik paasissutissiinermik aaqqissuussinermillu ukkassinerusoqassaaq.  Tassunga atatillugu meeqqanut nerisanut festivaalertitsisoqassaaq “Mamartut Festival – Meeqqat nerisassallu”, aalisakkat pillugit unammisitsinerit, aamma aalisakkanik iganermut meeqqanut ilitsersuut.
  • Susassaqarfiit akimorlugit Ataqatigiissaarinermut Ataatsimiititaliaq Pinaveersaartitsinermi Qitiusumik Ataatsimiititaliap (CFU) ataani inissisimasoq Tasiilami suliniummi matumani ataqatigittumi suliniuteqarpoq, tassani qulakkeerniarneqarpoq meeqqat tamarmik atualeqqaarnerminni atualernissaminnut piareersimassasut atuarnerminilu naammassippata ilinniaqqinnissaminnut piareersimassasut. Suliniutit susassaqarfiit oqartussaasullu akimorlugit ingerlanneqarput Qitiusumik Ataatsimiititaliamillu ataqatigiissarneqarlutik.
  • Paasititsiniaaneq ”Inuusuttuuneq pakkutsigu” april 2016 aallartilaarnerani sap.ak. 18-mi 22-milu saqqummiunneqaqqissaaq. Suliniutip siunertaraa meeqqat inuusuttullu tupamik, imigassamik hashimillu atuinerat pitsaaliorniarlugu. Tassanittaaq oqariartuutigineqarportaaq angajoqqaat meeqqatik inuusuttortatillu oqaloqatigissagaat – aamma imigassaq, pujortarneq ikiaroornartorlu hashi pillugu.
  • Timi aalatinnerulernissaaa siuarsarniarlugu ukiut tamaasa 2019 tungaanut nuna tamakkerlugu atuarfeqarfinni 25.000 kr.-nik eqqugassartalimmik unammisitsisoqartassaaq. Tassani atuarfimmi timi aalatinnerulernissaanut isumassarsiaq pitsaanerpaaq saqqummiunneqarsinnaavoq. Meeqqallu atuarfiani allornernik unammisitsinernik aaqqissuisoqartassaaq, taamaasilluni atuarnerup nalaani aalaneq sammisaqaqatigiinnerlu ukkannerulersinniarlugu.
  • Inuuneritta Pulje-p nerisaqarnerneq pillugu ukiumut anguniagaqarfiusumut Meeqqallu ukiuannut atatillugu immikkut ittumik meeqqanut inuussuttuaqqanullu nerisaqarneq pillugu  ukkassiffiusimapput.

Paasissutissanik allanik piniaraaanni pilersaarusiornermut aqutsisoq Emilie Kirstein oqarasuaat: +299 34 66 34 imaluunniit e-mail: emik@nanoq.gl attavigineqarsinnaavoq.