LIVEX 2016 Peqqinnissaqarfimmi

Ulluni kingullerni Illersornissaqarfiup aaqqissugaani sungiusarnermi – Livex 2016-imi peqqinnissaqarfik peqataavoq. Sungiusarnerup iliuusissatut siunniussassanut tunngatillugu immikkoortuani sungiusarnermilu namminermi, arfininngornermi maajip ulluisa 28-aniit sapaammi maajip ulluisa 29-annut iliuusissatullu siunniussassanut tunngatillugu sungiusarnermi ataasinngornermi marlunngornermilu ingerlanneqartumissaaq peqataalluni.

Aqutsisoqarfiup pisortaa Jóanis Erik Køtlum oqarpoq: ”Immikkoortortat tamarmik portørit annaassiniartartut-, nakorsat-, peqqissaasut-, sundhedsassistentit-, aaviisartut ingerlatsinermillu suliallit immikkut sulisulersorneqarput. Sungiusarnerup suliffitsinnut ilinniarfiunissaa anguniarlugu sulisut tamarmik annertuumik sulipput.”

Sungiusarnermi umiarsualivimmi ajoqusersimasunut katersuuffimmi ajoqusersimasunik sullissinikkut, ajoqusersimasunut nakorsiartarfimmi immikkoortortanilu makkunani: pilattaavimmi/ peruluttunut -, nakorsartittunut pilatsittunullu immikkoortortaqarfinni, qinnguartaavimmi aaviisarfimmilu sulisunik amerliliinikkut peqqinnissaqarfik peqataavoq. Peqqinnissaqarfik Kalaallit Nunaanni upalungaarsimatitanut (Grønlands Beredskabs Stab) Kalaallit Nunaanni ajunaarnersuaqassagaluarpat upalungaarsimasunit ataqatigiisaarisuusussami naapertuuttunik aallartitaqartumi ilaavoq.

Ingerlatsinermut tunngatillugu sungiusarneq pissutaalluni Dronning Ingridip Napparsimmavissua arfininngorneq sapaallu pulaanut matoqqatinneqarpoq.

"Ajunaarnersuaqarnerasuulli iliuuseqartariaqarsimavugut, taamaattoqassappallu inunnik annaassiniarneq ajoqusersimasunillu passussineq akornuserneqaqqunagu napparsimmavik pulaartunut matoqqatinneqassaaq ”, nakorsat qullersaat Anne Marie Ulrik nassuiaavoq.

Dronning Ingridip Napparsimmavissua sapaammi ualikku ataatsinut pulaartunut ammaqqippoq.

Peqqinnissaqarfimmit isigalugu sungiusarnerup qanoq ingerlasimaneranut apeqqummut akissut tassaavoq: ”Sungiusarneq peqqinnissaqarfimmi ingerlalluartutut isummerfigineqarpoq, maannali sungiusarnerup naliliiviginissaa sunillu ajunaarnersuaqassagaluarpat upalungaarsimanermut atatillugu pilersaarutitsinnut ilanngussassanik ilinniarfiusimanerata paasiniarnissaa tullinnguuppoq”nakorsat qullersaat Anne Marie Ulrik naggasiivoq.

Peqqinnissaqarfik iliuusissatut siunniussassanut tunngatillugu sungiusarnermi peqataanermut sapaammi ikaarsaarpoq tamatumunngalu akuulluni marlunngornermi ullup qeqqata tungaanut.

Assit sungiusarnermit