Timmissanik masarsoqarfinnillu pingaarutilinnik illersuinermut nalunaarut nutaaq

Nalunaarut nutaaq timmissanik masarsoqarfinnillu pingaarutilinnik illersuinerup pitsaanerulerneranik kinguneqassaaq

Kalaallit Nunaanni masarsoqarfiit nunanit tamalaanit toqqarneqartut illersorneqarnissaat aamma timmissat imarmiut ilaasa illersorneqarnissaat pillugu Namminersorlutik Oqartussat nalunaarutaat nr. 12, 1. juni-imeersoq (Ramsar-eqarfinnut nalunaarut) 1. september 2016-imi atuutilissaaq. Nalunaarummi sumiiffinni Ramsar-eqarfiusuni, pingaartumik sumiiffiit timmissanut imarmiunut pingaaruteqarnerat eqqarsaatigalugu illersuinissaq sulianullu maleruagassiuinissaq siunertarineqarpoq.

”Nuannaarutigaara nalunaarutip matuma atuutilerneratigut sumiiffinnik Ramsar-eqarfiusunik illersuinermut atuinermullu sinaakkutissanik aalajangersimasunik oqimaaqatigiissitsiviusunillu peqalissagatta. Nalunaarut sumiiffiit Ramsar-eqarfiusut siunissami uumasunut inunnullu iluaqutaanissaannut qulakkeereqataassaaq. Pingaartumik sumiiffinni taakkunani timmissat illersussavavut, kisiannili atuineq nungusaataanngitsumik ingerlanneqarsinnaappat , sumiiffiit taakku suli atorneqarsinnaassapput. Tamanna pinngortitamut uatsinnullu pinngortitamik nuannarinnittuusunut nutaarsiassaavoq pitsaasoq”, Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko oqarpoq.

Nalunaarut Ramsar-eqarfinnut isumaqatigiissummi Kalaallit Nunaata nunani tamalaani pisussaaffiinik naammassinnitsitseqataavoq. Ramsar-eqarfiit pillugit isumaqatigiissut masarsoqarfinnik illersuinissaq nungusaataanngitsumillu atuinissaq pillugu nunani tamalaani isumaqatigiissutaavoq. Isumaqatigiissummi pingaartumik masarsoqarfiit, timmissanut imarmiunut uumaniarfittut pingaarutillit, aammalu timmissanit imarmiunit amerlasuunit tikinneqartarnertik, imaluunniit uumasunit naasunillu qaqutigoortunit najorneqarnertik pissutigalugu nunanut tamalaanut sunniuteqartartut siunnerfigineqarput.

Kalaallit Nunaanni sumiiffiit 12-it, tamakkerlutik 13.000 km2-nik annertussusillit Ramsar-eqarfittut toqqarneqarsimapput. Sumiiffinnik 12-inik taakkuninnga toqqaanermi sumiiffiit timmissanut imarmiunut, pingaartumillu nerlernut pingaarutillit illersorniarneqarput. Nalunaarummi Kalaallit Nunaanni sumiiffiit Ramsar-eqarfiusut nunap inatsisaatigut illersorneqarnissaat, aammalu sumiiffinnik Ramsar-eqarfiusunik ornigaqartarnermut atuinermullu maleruagassanik aalajangersaanissaq qulakkeerneqarpoq. Aalajangersimasumik nalunaarummi nunakkut angalasarneq, imaatigut angalasarneq, timmisartortarneq, illut atortullu allat, kiisalu aalisarneq nunalerinerlu pillugit maleruagassanik aalajangersaasoqarpoq.

Ramsar-eqarfiit pillugit nalunaarut saqqummiussineq aqqutigalugu nassaarineqarsinnaavoq, http://naalakkersuisut.gl/kl-GL/Kundgoerelser/2016.

Annertunerusumik paasisaqarusunnermi immikkoortortaqarfimmi pisortaagallartoq

Camilla Østbirk 34 60 19 imaluunniit  caos@nanoq.gl aqqutigalugu attaveqarfigineqarsinnaavoq.