Kommune Kujallermut ikiuunneq

Ulloq 18. april 2016 Ilaqutariinnermut, Naligiissitaanermut Isumaginninnermullu Naalakkersuisoq, Martha Lund Olsen, Kommune Kujallermit allagarsivoq, tamatumani kommunip isumaginninnermut ingerlatsivimmi innuttaasunik sullissineq sulianillu suliarinninneq pitsanngorsarniarlugit kommunip sulisutigut ikiorneqarnissani qinnutigaa.

Kommune Kujallermiit saaffiginninnerup kinguninngua Ilaqutariinnermut, Naligiissitaanermut Isumaginninnnermullu Naalakkersuisoqarfiup Qitiusumik Siunnersuisarfimmi sulisut pingasut kommunimut aallartippai. Taamatut iliornikkut sulianik nukinginnarnerpaanik Kommune Kujallermut ikiuunnissaq siunertaavoq, kiisalu ungasinnerusumut isigaluni kommunimut pilersaarusiornissaq siunertaralugu paasissutissanik katersinissaq siunertaalluni.

Qitiusumik Siunnersuisoqarfiup Kommune Kujallermut angalaneranit Ilaqutariinnermut, Naligiissitaanermut Isumaginninnermullu Naalakkersuisoqarfik utimut nalunaarfigineqartarnermigut isumaqarpoq, innuttaasut pisariaqartitaminnik ikiorneqarnissaat qulakkeerniarlugu kommunip saaffiginnissutaata malinneqarnissaa pingaaruteqartoq.

Tamanna pissusiviusutigut isumaqarpoq, sulianik suliarinninneq, ilanngullugit suliat meeqqanut inuusuttunullu tunngasut pisariaqartitamik suliarineqarnissaat qulakkeerniarlugu, Ilaqutariinnermut, Naligiissitaanermut Isumaginninnermullu Naalakkersuisoqarfiup aamma Qitiusumik Siunnersuisoqarfiup sulisut tallimat missaat kommunimut aallartissagai.

Martha Lund Olsen oqarpoq ”Kommunip pissutsit atugai ernumanartorujussuupput, taamaattumik suliassaqarfimmi pinasuartumik iliuuseqarnissap salliutinnissaa pingaaruteqartutut isigaara, taamaasilluni innuttaasut pisariaqartitaminnik sullinneqarnissaat qulakkeerneqassammat.” nangipporlu ”Suliap ingerlanerani tamarmi kommuni pitsaasumik kingunissalimmillu oqaloqatigineqartarpoq, kommunillu oqaatigaa kommunimi pissutsit aaqqinniarnerat annertuumik salliutinneqartoq.”

Ilaqutariinnermut, Naligiissitaanermut Isumaginninnermullu Naalakkersuisoqarfik Kommune Kujalleq suleqatigalugu suleqatigiinnissamut isumaqatigiissummik aalajangersimasumik maanna suliarinnippoq, taassumalu Naalakkersuisoq Martha Lund Olsenimit aamma Borgmester Jørgen Wæver Johansenimit piaarnerpaamik atsiorneqarnissaa naatsorsuutigineqarpoq.

Suleqatigiinnissamut isumaqatigiissut ulloq 1. juni 2016-imi atuutilissaaq, 2016-imilu novemberip naaneranut atuutissalluni.

Paasissutissanik annertunerusunik pissarsiniaruit Naalakkersuisumut allatsi Hanne Nielsen, +299 53 93 71-mut sianerlutit attaveqarfigiuk.