Upernarpoq aasalerluni timmissallu takkussuullutik

Appat lomvier

APNN piffissap sumiiffiullu avataani appanik pisaqartoqarsimaneranik nalunaarutinik tigusaqaqqammerpoq, ajoraluartumik unioqqutitsinerusut. Erseqqissaatigineqassaaq appanniarsinnaaneq ulloq 29/2 naammat.

Taamaallaat Qaanaap aamma Ittoqqortoormiit aqutsiveqarfiini upernaakkut appanniartoqarsinnaavoq. Ittoqqortoormiini upernaakkut appanniarneq 31. maj naassaaq, Qaanaamilu naassalluni ulloq 15. juni. Sumiiffinni allani piniarneq unioqqutsitsinertut isigineqassaaq, politiinullu nalunaarutiginnittoqartassalluni taamatut aalajangersagaq eqquutsinneqanngippat.

Taamatuttaaq aammaarluni erseqqissaatigineqassaaq appat imeqqutaallallu manniinik mannissarniartarneq inerteqqutaammat. Sumiiffinni arlalinni appat ikiliartupiloorsimapput, tassanilu mannissarniartarneq oqaatigineqarluni taamatut ikiliartornermut annerpaamik peqqutit ilaattut. Pingaaruteqarpoq aalajangersakkat qulaani taaneqartut eqquutsinneqarnissaat, siunissami aamma appanniartoqartarsinnaassappat.

Taamaallaat nammineq atugassanik qaqulluit, naajarluit naajarujussuillu mannii ulloq taanna 31. maj ilanngullugu katersorneqarsinnaapput. Taamaattorli Inuit Qeqqata kommuniata avannamut killeqarfianiit Qaanaami aqutsiviup kujammut killeqarfia tikillugu najugallit namminneq atugassaminnik  naajarujussuit naajarluillu manniinik ulloq taanna 15. juni ilanngullugu katersisinnaapput.  Inuit Qaanaap aamma Ittoqqortoormiit aqutsiveqarfiini najugallit namminneq atugassaminnik appaliarsuit manniinik katersisinnaapput. Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.

Naggasiullugu APNN-imit timmiaqarfiit aamma sumiiffiit timmissanik eqqissisimatitsiviusut pillugit aalajangersakkat erseqqissaatigineqassapput. Timmiaqarfinnut aamma sumiiffinnut timmissanik eqqissisimatitsiviusunut immikkut ittumik eqqissisimatitsinissamik aalajangersakkat saniatigut, Kalaallit Nunaanni sumiiffinni tamani timmissat ullui piareerneqaqqammersut ivaffiusulluunniit, kiisalu timmissanit nujuartanit manniit piaqqallu ajoquserneqarnissaat allatulluunniit akornusersorneqarnissaat inerteqqutaammat. Taamaattorli appaliarsuit malamuillu piaraannik katersineq kiisalu soorlu qulaani allaaserineqarsimasutut mannissarniartarneq inerteqqutaanngilaq.

Sukumiinerusumik paasissutissat pissarsiarineqarsinnaapput immikkoortoqarfiup pisortaanut Amalie Jessenimut saaffiginninnikkut amalie@nanoq.gl - oqa. 345304/553342