Misissukkat qulingiluat tamarmik akoqanngillat

Inerneri tamarmik maanna takkussimalerput. Naalakkersuisunut ilaasortat qulingiluaasut tamarmik quui hashimik akoqanngillat

Naalakkersuisut hashi akiorniarlugu pilersaarutaasa saqqummiunneqarneranut atatillugu naalakkersuisooqatigiinnissamullu isumaqatigiissut naapertorlugu Naalakkersuisunut ilaasortat hashimik atuisimanermut misissugassamik ippassaani quisinneqarput. Naalakkersuisut hashimik akuersaanngilluinnarnertik maligassiuisuunertillu ersersinniarlugit quisinneqarput.

Inerneri tamarmik maanna takkussimalerput. Naalakkersuisunut ilaasortat qulingiluaasut tamarmik quui hashimik akoqanngillat.

Naalakkersuisut Siulittaasuat Kim Kielsen oqarpoq: "Hashi inerteqqutaavoq, tamannalu uteqqittaqattaagassaavoq. Taamaammat naatsorsuutigaara Naalakkersuisut hashimik atuisuunngitsut. Ilaasortat namminneerlutik aalajangerpaat misissugassamik quissanerlutit, nuannaarutigaaralugu tamarmiullutik isumaqaramik peqataanermikkut, minnerunngitsumillu ikiaroornartumik atuisuunnginnermikkut, maligassiuisutut salliusariaqarlutik."

Peqqissutsimut Naalakkersuisoq Doris Jakobsen naalakkersuisooqatigiinnissamut isumaqatigiissummi allassimasoq naapertorlugu Naalakkersuisut misissorneqarnissaannut iliuuseqarpoq. Imallu oqarpoq:

"Kalaallit Nunaanni ikiaroornartumik hashimik atornerluisut amerliartuinnarnerat ajornartorsiutigivarput. Inuusuttut atuisut amerliartornerat ernumanartorujussuuvoq", nangipporlu: "Hashi akiorniarlugu nuna tamakkerlugu iliuusissatut pilersaarusiornitsigut hashimik atornerluinerup ajornartorsiutaanera ukkatarineqalerpoq Naalakkersuisullu suliassaqarfii akimorlugit suliniutit arlaqartut aallartisarneqarlutik. Inuusuttortatta atornerluilinnginnissaannut suliniarneq inuiaqatigiinni akisussaaqataaffigaarput."

Ilinniartitaanermut Naalakkersuisup Nivi Olsenip misissuineq aamma ajorinngilaa: "Ilinniarfinni hashimik atornerluineq Naalakkersuisunit ukkatarineqarpoq ilinniarfeqarfiit pisinnaatitaaffiinik qulakkeerinnittussamik inatsisissamik siunnersuusiornikkut. Naalakkersuisut hashimik akuersaannginnerat misissorneqarnissamullu qununnginnginnerat taamaammat inuusuttortatsinnut oqariartuutaavoq ersarissoq.”

Hashimik atuisimanerup kingorna qanoq sivisutigisumik quumi ersiuteqartarnera assigiinneq ajorput. Ataasiarlunili atuisimagaanni sapaatip akunnerata missaa ersiuteqartarpoq, akuttunngitsumilli atuisuugaanni sapaatit akunneri arfinillit tikillugit ersiuteqartarluni.

Paasisaqarnerorusuttut saaffigisinnaavaat Naalakkersuisumut allattaagallartoq Nauja Møller, oqarasuaat +299 34 66 05, imaluunniit e-mail naum@nanoq.gl