Kalaallit Nunaanni upalungaarsimanermut sungiusarneq

Upalungaarsimanermut sungiusarneq ’Grønland LIVEX 2916’ Naalagaaffeqatigiit Kalaallit Nunaanni sungiusarneraat, ajunaarnersuaqassagaluarpat Kalaallit Nunaanni Danmarkimilu oqartussat ataqatigiissaarisinnaanerat immikkullu pisoqartillugu qanoq pilersaarusiassanik ilusilersuisut, suleriaatsinik ilusilersuisut periaatsinillu aqutsisut suleriaaseqarnerat sungiusarneqarlutillu nukittorsarniarneqarlutik. Sungiusarneq Kalaallit Nunaanni annaassiniarluni avatangiisillu pillugit sungiusarnerni annersaavoq.

"Upalungaarsimanermut Naalakkersuisutut nuannaarutigaara illersornissaqarfik Kalaallit Nunaannilu oqartussaqarfiit arlaqartut taamak annertutigisumik Nunatsinni sungiusassammata. Upalungaarsimanermik suliaqartut pinartumik pisoqartillugu pitsaanerpaamik sulisinnaanissaat qulakkeerniarlugu sungiusarneq pingaaruteqarpoq. Immikkuutitaartuni tamani upalungaarsimanerup misilerarnissaanut periarfissatsialaavoq, oqartussanut, innuttaasunut takornarianullu iluaqutaasumik. Taamaammat neriuutigaara sungiusaqataasut tamarmik pissarsiaqarluarumaartut," Pinngortitamut, Avatangiisinut Nukissiuuteqarnermullu Naalakkersuisoq Mala Høy Kúko oqarpoq.

Sungiusarneq arfininngornermi 28. maaji aallartissaaq  umiarsuit marluk Nuup avataani aportuusaartinneqassallutik. Ulluni sisamani tulliuttuni Kalaallit Nunaanni oqartussani, Kalaallit Nunaanni Politiini Arktisk Kommandomilu akisussaasut suleqatigiissutigalugu umiarsuarnut ilaasunik ikilerneqarsimasunik, umiusimasunik aarlerinartorsiortunillu kiisalu inuttanik annaassiniassapput. Ilaqutaasut, oqartussat tusagassiorfiillu nunani arlaqartuniittut ilisimatinneqassapput avatangiisinilu ajunaarneqaratarsinnaanera pinaveersimatinniarneqassalluni.

 

Paasisaqarnerorusuttut attavigisinnaavaat Naalakkersuisoqarfimmi pisortaq Mette Skarregaard Pedersen, oqa.: +299345122 e-mail: mesp@nanoq.gl.