Nikolaj Jeremiassen Naalakkersuisunngortoq

Karl-Kristian Kruse Naalakkersuisunit tunuarpoq, Nikolaj Jeremiassenilu Aalisarnermut, Piniarnermut Nunalerinermullu Naalakkersuisunngorluni

Aalisarnermut, Piniarnermut Nunalerinermullu Naalakkersuisoq Karl-Kristian Kruse, Siumut, Naalakkersuisuunerminit tunuarusulluni Naalakkersuisut Siulittaasuannut ilisimatitsisimavoq.

Naalakkersuisut Siulittaasuat Kim Kielsen oqarpoq:

”Karl-Kristian Krusep tunuarniuteqarniarluni kissaateqarnera ataqqivara tusaatissatullu tigullugu. Periarfissaq iluatsillugu Karl-Kristian Kruse Aalisarnermut, Piniarnermut Nunalerinermullu Naalakkersuisutut sulilluarsimaneranik Naalakkersuisunilu suleqatigilluarsimaneranik qujassuteqarfigissavara.

Karl-Kristian Krusep Naalakkersuisuni ilaasortatut tunuarniuteqarnerata kingunerisaanik aalajangerpunga Nikolaj Jeremiassen, Siumut, Aalisarnermut, Piniarnermut Nunalerinermullu Naalakkersuisunngornissaa innersuussutigissallugu.”

Naalakkersuisut Siulittaasuata Naalakkersuisunut ilaasortanik paarlaattoqarnera iluatsillugu Naalakkersuisunut ilaasortaasut akornanni suliassaqarfiit akisussaaffigineqartut allanngortitsilaarpoq.  Inatsisinik Atuutsitsinermut suliassaqarfik massakkut Pinngortitamut, Avatangiisinut Inatsisinillu Atuutsitsinermut Naalakkersuisumit akisussaaffigineqartoq Ilaqutariinnermut, Naligiissitaanermut Isumaginninnermullu Naalakkersuisoqarfimmut nuunneqassaaq. Nunani tamalaani uummassusillit assigiinngisitaartuunerat pillugu suliassaqarfik Inuussutissarsiornermut, Suliffeqarnermut, Niuernermut, Nunanullu Allanut Naalakkersuisoqarfimmit Pinngortitamut, Avatangiisinut Nukissiuuteqarnermullu Naalakkersuisoqarfimmut nuunneqassaaq.

Allannguutit siuliani taaneqartut kingunerisaanik Naalakkersuisunut ilaasortat susassaqarfiilu imaalerput:

  • Kim Kielsen, Siumut, Naalakkersuisunut Siulittaasoq.
  • Randi Vestergaard Evaldsen, Demokraatit, Aningaasaqarnermut Aatsitassanullu Naalakkersuisoq.
  • Knud Kristiansen, Atassut, Ineqarnermut, Sanaartornermut Attaveqaqatigiinnermullu Naalakkersuisoq.
  • Nikolaj Jeremiassen, Siumut, Aalisarnermut, Piniarnermut Nunalerinermullu Naalaakkersuisoq.
  • Vittus Qujaukitsoq, Siumut, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq.
  • Martha Lund Olsen, Siumut, Ilaqutariinnermut, Naligiissitaanermut, Isumaginninnermut Inatsisinillu Atuutsitsinermut Naalakkersuisoq.
  • Doris Jakobsen, Siumut, Peqqinnissamut Naalakkersuisoq.
  • Nivi Olsen, Demokraatit, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq.
  • Mala Høy Kúko, Atassut, Pinngortitamut, Avatangiisinut Nukissiuuteqarnermullu Naalakkersuisoq.

 

Paasisaqarnerorusuttut attavisiginnaavaat Naalakkersuisumut allatsi Karen Motzfeldt, oqarasuaat +299 34 64 58 imaluunniit e-mail karm@nanoq.gl, imaluunniit Naalakkersuisumut allatsi Kirsten Enequist, oqarasuaat +299 34 56 04 imaluunniit e-mail kien@nanoq.gl.