Nunatta Canadallu akornatigut umiarsuit angalasinnaatitaassanngillat

Qaanaami piniartut, nunarsuarput kissannerulerpat, aarleqqutigaat ikerasak nunatta Canadallu akornanniittoq umiarsuarujussuarnik angallaffigineqalerujussuarnissaa, taakkutulli aarleqquteqarpunga.

Ingammik aarleqquteqarneruvunga aatsitassarsiuleqatigiit Citronfjordimi zinkimik aqerlumillu piaalerpata ikerasak taanna aamma aqqutigalugu assartuisinnaalernissaat.

Taamaattumik nuannaarutigisorujussuuara Pikialarsoorsuaq kommissionimik pilersitsisoqarsimammat. Kommissioni Canadap avannaarsuani innuttaasunik tusarniaatitseqqammerpoq, kingorna nunatta avannaani aamma tusarniaassalluni.

Uannut pingaaruteqartorujussuuvoq tamaani piniartut tusarniaavigineqarnissaat, imartami Pikialasorsuarmi piniariartarneri paasisaqarfigissallugit.

Pikialasorsuaq piniagassanik ulikkaarluinnarpoq. Qilalukkat qernertat, aarrit, nannut aamma puisit amerlasoorpassuullutik timmissanillu aamma ulikkaarluni.

Matumuuna kommissionip suliaa nersualaarusuppara, nunatta avannaani tusarniaareerunik tusarniaarnermit inernerit inassuteqaataallu aalajangiisartunut tunniussammagit.

Ilanngullugu neriuutigaara inassuteqaatit ilagissagaat Pikialasorsuarmi umiarsuarnik angisuunik angallanneq inerteqqutaalissasoq. Taamaanngippammi tamaani piniagassarpassuit Qaanaami eqqaanilu piniartunut akornusigaallutik allamut nuussinnaapput, piniartutut inuussutissarsiuteqarneq tunngavissaarussinnaalluni.

Pikialasorsuaq, silaannaap allanngorneranik malussarissorujussuusoq,  Kalaallit Nunaata Canadallu akornanni sikoqarferujussuarmiippoq. Nunarsuup avannaani, qaasuitsup killeqarfiata avannaani pinngortitaassutsikkut uumasuaqqanik tappiorannartunik pilersitsinerpaasartuulluni.

 

Aalisarnermut, Piniarnermut Nunalerinermullu Naalakkersuisoq, Karl-Kristian Kruse Pikialasorsuaq kommissionimik pingasunngornermi maajip 18-ianni 2016 ataatsimeeqateqarpoq.

 

Attavigineqarsinnaavoq:
Ludvig Siegstad, Aalisarnermut, Piniarnermut Nunalerinermullu Naalakkersuisoqarfimmi paasissutissiisartoq, e-mail
lusi@nanoq.gl.