Kalaallit Nunaanni angutit atugarisaat isiginiarneqarnerutillugit

Ullutsinni angutit Kalaallit Nunaanni atugarisaat isiginiarneqarnerutillugit.

Ulloq 20. maj Kalaallit Nunaanni Naligiissitaanerup ulloraa. Arnat angutillu naligiissitaanerisa qitiutinneqarnissaat siunertaavoq.

Naligiissitaaneq pillugu oqallinnermi arnat angutitulli periarfissaqarnissaat qitiutinneqarajuttarpoq. Soorunami arnat taamatut periarfissaqassapput, angutilli amerlaqisut ineriartornermit katataasimanerat, ilinniagaqaleratillu suliffeqalersannginnerat amerlaqisut puigortarpaat, peqatigisaanillu inuiaqatigiit inuuffigisavut sukkaqisumik allanngoriartorlutik nutaanik piumasaqaatitalimmik,” oqarpoq Martha Lund Olsen, Ilaqutariinnermut, Naligiissitaanermut Isumaginninnermullu Naalakkersuisoq, Kalaallit Nunaanni Naligiissitaanerup Ullua 20. maj nalliussillugu.

Arnat amerligaluttuinnartut illoqarfinnut nuuttarput, ilinniagaqarlutik, atorfeqalerlutik, atorfimminnilu qaffakkiartortarlutik. Ikittuaraannaat inunngorfimminnut uteqqittarput. Peqatigisaanillu angutit ilinniagaqartarnerat suliffeqalertarnerallu annikinneruvoq, inunngorfimminnilu najugaqaannarajuttarlutik, arnat amerlanerusut illoqarfinni anginerusuni najugaqaannalersartut. Tamanna innuttaasunik equngasumik ineriartulersitsivoq, angutinillu tamaviaartitsilluni.    

Angutit isumasioqatigiissinneqarnerannut aamma nunatsinni sumiiffinni tamani Angutit Oqaloqatigiiffeqalernissaanut tapersiineq

Majip aallartisisimalernerani Nuummi isumasioqatigiissitsineq ingerlanneqarpoq, qulerutaralugu angutit atugarisaat.

Isumasioqatigiinneq angutaannarnut ammasuuvoq, angutit atugarisatik pillugit – arnanik ilaqaratik – ammasumik oqaloqatigiissuteqarsinnaanissaat pingaaruteqarmat.

Anda Poulsen, Naligiissitaanermut Siunnersuisoqatigiinni aamma ilaasortaasoq suliniuteqartuuvoq oqaaseqartartuullunilu.

2016-imi aasap naalernerani nunatsinnit tamarmit peqataaffigineqartumik Kangerlussuarmi nutaamik isumasioqatigiissitsisoqarnissaa pilersaarusiorneqarpoq, taannalu majimi isumasioqatigiinnerup nanginnerissavaa. Ilaatigut Nunatsinni tamarmi najukkani Angutit Oqaloqatigiiffiinik pilersiktsinissaq siunertaavoq, taakkunani angutit inuttut ineriartorneq, suliffik, ilaqutariittut inuuneq, suiaassutsimut inissisimanerit, atornerluineq, nakuuserneq pissutsillu allat oqaloqatigiissutiginiarlugit orniguffissaqarsinnaaqqullugit.

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq, Ukioq 2016-imi angutit atugarisaat pillugit oqallinnermi angutit saqqummeralernerat – nammineerlutillu oqaatiginiakkatik atorlugit – tusaaneqarsinnaanerat ajunngivippoq pingaaruteqarlunilu. Taamaattumik angutit najukkani Angutit Oqaloqatigiiffiinik pilersitsiniarnerat tapersersorparput”.  

Majip aallartisimalernerani isumasioqatigiinnermut Ilaqutariinnermut, Naligiissitaanermut Isumaginninnermullu Naalakkersuisoqarfik tapiissuteqarpoq, aammattaaq 2016-imi aasap naalernerani isumasioqatigiinnermut tapiissuteqarniarluni, soorlu aamma angutinut nakuusertartunut katsorsartinneqarnissamik neqeroorutinik pilersitsinissaq sulissutigineqartoq.

 

Paasissutissanik annertunerusunik pissarsiniaruit attavissaq: Naalakkersuisup allattaa Hanne Nielsen, oqarasuaatip normua: 34 66 04