Issittumi ilisimatusarnikkut nunarput Kinalu suleqatigiinnerulissapput

Pingasunngornermi maajip 11-ani 2016-imi Beijing-imi State Oceanic Administration (SOA) aamma Shanghai-imi Polar Research Institute of China, tassaasut Kinap imartaanik avantangiisaanillu nakkutiginninnermik qullersaqarfik aamma Kinap issittumi ilisimatusarnermi aqutsisoqarfia, SOA-p qullersaata tullersortaa Mr. CHEN Lianzeng siulersortigalugu, Ililnniartitaanermut Kultureqarnermut Ilisimatusarnermut Ilageeqarnermullu Naalakkersuisoq Nivi Olsen-imut tikeraarput.

Tikeraarneq Pinngortitaleriffimmut, Ilisimatusarfimmut Asiamullu paasisassarsiortitsinermik aallarnerneqarpoq. Kingornalu Naalakkersuisoq peqatigalugu ataatsimiinneq ingerlanneqarpoq tassani eqqartorneqarlutik suleqatigiinnerulernissamut periarfissaasinnaasut.

Tamatuma kingorna Memorandum of Understanding (MoU) – Paaseqatigiinnerulernissamut erseqqissaat, Nivi Olsen-imit Mr. CHEN Lianzeng-imillu atsiorneqarpoq.  

MoU-p siunertaraa Nunatta Kinallu akornanni issittumi ilisimatusarnikkut suleqatigiinnerulernissaq, ilaatigut ilisimasassarsiorfimmik pilersitsisinnaanermik imaqartoq aamma ilisimatusartunik ilisimatuunillu paarlaasseqartigiissinnaanermik ilaqarluni.

Mr. CHEN oqaaseqarnermini erseqqissarpaa MoU nunanut taakkununnga siunissami issittumi ilisimatusarnikkut suleqatigiillualernermik kinguneqarnissaa pingaartikkitsik.

Nivi Olsen ilaatigut oqarpoq Naalakkersuisut sinnerlugit nuannaarpunga tullussimaarlungalu MoU pilersissinnaagatsigu, taassuma takutippaa immitsinnut ataqqeqatigiilluta pitsaasumik siunissami suleqatigiissinnaanissarput tamattaalluta kissaatigisarigipput”

Annertunerusumik paasisaqarusunnermi saaffigineqarsinnaavoq Naalakkersuisup allattaa Eqaluk Høegh, e-mail: eqah@nanoq.gl-imut Oqarasuaat: +299 560299