Nunatta karsia 2015-imi sinneqartoortoq

Nunatta Karsiata 2015-imut naatsorsuutai ingerlatsinermi sanaartornermilu 137 mio. kr-inik sinneqartoorput

Nunatta Karsiata 2015-imut naatsorsuutai naammassillugit kukkunersiorneqareerput. Namminersorlutik Oqartussat kukkunersiuisuisa Deloittep, Nunatta Karsiata naatsorsuutai sillimmartaarutitaqanngitsunik oqaaseqarfigai.

Nunatta Karsiata 2015-imi ingerlatsinermi sanaartornermilu 137 mio. kr-inik sinneqartooruteqartoq naatsorsuutit takutippaat. Missingersuutaasunit nikingassut annertuvoq. 2015-imimi ilassutitut aningaasaliisutit 73 mio. kr-it ilanngullugit missingersuuteqarpugut. Aallatut oqaatigalugu: nikingassut 210 mio. kr-inik annertussusilik.

Nunatta Karsiata taamak pitsaatigisumik angusaqarneranut toqqammaviit pitsaasut arlallit patsisaapput. 2015-imi aalisarnermi akigissaartitsineq toqqammaviit annerpaat ilagaat, tassunga ilanngullugu minnerunngitsumik qaleralinnut raajanullu akitsuutitigut isertitat amerlanerusut. Tulliullugulu sanaartornermi aningaasaliissutit annertuut, soorlu isertitsivissaq Nuummilu umiarsualivissaq Nunatta Karsianut suliffeqarfiit maanngaanneersut akileraarutinut akitsuutinullu akiliuteqarnerunerisigut isaatitsineruffiupput.

”Nunatta Karsiata naatsorsuutaasa inernerat naammagisimaarnartupilussuuvoq. Inernerusullu aamma pisortani aningaasaqarnitsinnik aqutsisinnaanermut piginnaanitta pitsaaneruleriartorsimanera nuannaarutissaasumik aamma takutippaa.", Randi Vestergaard Evaldsen, Aningaasaqarnermut Aatsitassanullu Naalakkersuisoq nuannaaqisoq oqarpoq, imalu nangilluni:

”Naalakkersuisut ukiuni marlussunni kingullerni aningaasaqarnikkut pitsaanerusumik aqutsinissaq immikkut sammivaat, taamaammallu suliaqarnitta annertuup maannangaaq Nunatta Karsiata naatsorsuutaani takuneqarsinnaalereernera nuannaajallannartuuvoq”.

Aningaasaqarnermut Aatsitassanullu Naalakkersuisoq naapertorlugu Nunatta Karsiata angusaasa pitsaasut, siunissami aningaasaqarnikkut unammilligassatta aaqqinneqarnerattut, taamaalillutalu ullumikkornit aningaasanik amerlanernik atuisinnaalernitsinnik paasineqassanngilaq. Unammillernartut suli taakkuupput.

”Ilisimaneqartutut aalisagaatitta akii nikerartupilussuupput. Masakkut qujanartumik qaffasipput, tassanngaannarli apparsinnaapput, taamaattoqarneranilu Nunatta Karsiata aalisakkanit isertitai appassapput. Utoqqaat sulisinnaasunit amerlanerunerisigut innuttatta katitigaanerisigut unammilligassavut suli taakkuupput. Ingerlatavut unitsiinnarlugit aningaasanik amerlanerusunik atuileriataarsinnaanngilagut. "Siunissamut ungasissumut isigisumik suliatsinni" anguniagaqarput suli aalajangiusimassavarput", Randi Vestergaard Evaldsen erseqqissumik oqarpoq.

Nunatta Karsiata 2015-imut naatsorsuutai Inatsisartuni akuerineqartussaapput. Siunnersuummik siullermeerinninnerup maajip 27-iani pinissaa naatsorsuutigineqarpoq - aappassaaneerinninnerlu Inatsisartut ukiaanerani ataatsimiinneranni pissaaq.

 

Paasisaqarnerorusuttut attavigisinnaavaat Tusagassiuutinut ataqatigiissaarisoq Martin Christiansen, Aningaasaqarnermut Naalakkersuisoqarfik, mobiltelefon +299 221533.