Suliniutit nutaat inuusuttunut anguniakkanut iluaqutaassapput

Nalunaarusiami nutaami  pingaarnertut inerniliinerit Namminersorlutik Oqartussat ullumikkut avammut saqqummiutissavaat, tassa inuusuttut anguniakkatut taaneqartartut piginnaasaasa qaffassarnissaannut periarfissat atuuttut qulaajarneqarput. Nalunaarusiami inassuteqaatit ilaatigut kalaallit inuusuttut 16-18 ukiullit ilinniagaqarnissamut annertunerusumik piareersimatinniarlugit politikkikkut suliniutinut tunngaviussapput.

”Immikkoortup sammineqarnerulernera Naalakkersuisut nuannaarutigaat, nalunaarusiamilu inassuteqaatit tunngavigalugit suliniutit arlallit aallartereerpagut”, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Nivi Olsen, oqarpoq, taassumalu ilaatigut inuusuttut aningaasaateqarpallaanngitsut Danmarkimi akeqanngitsumik efterskolersinnaanerat kiisalu inuusuttut meeqqat atuarfianni naammassereerlutik ilinniaqqinnissamik pilersaaruteqanngitsut 11. klassimi tamatigoortumik atuarnissamut periarfissaqarnerat taallugit.

”Danmarkimi efterskolerneq amerlasoorpassuarnut ingerlallualersitsisinnaavoq, ilaqutariinnilu aningaasaqarniarneq ajoqutaasarnera uggornarluni. Tamatigoortumik 11. klassimi atuarnikkut inuusuttut 10. klassimi naammassereerlutik toqqaanaartumik annaaneqannginnissaasa qulakkeerneqarnera ilimanartorujussuartut aamma isigaara. Tamatigoortumik 11. klassimi atuartarneq pillugu politikkikkut partiit kommunillu oqaloqatiginissaat qilanaaraara,” Nivi Olsen nassuiaavoq.

”Inuusuttortagut Kalaallit Nunaata siunissarai, taamaammallu piginnaasaaminnik qaffassaanissaminnut pitsaanerpaanik atugassaqartinnissaat naggataatigullu takorluukkaminnik ilinniagaqarnissaat pingaaruteqartorujussuuvoq.”

Nalunaarusiaq Meeqqat atuarfiat allat aqqutigalugit Namminersorlutik Oqartussanit KANUKOKA suleqatigalugu suliarineqarpoq. Eqikkaaneq uani atuarneqarsinnaavoq. Nalunaarusiaq tamarmiusoq nutserneqareerpat nassiunneqassaaq.


Annertunerusumik paasisaqarusunnermi saaffigineqarsinnaavoq Naalakkersuisup allattaa Eqaluk Høegh oqa. +299  34 5702