Atuffarliorneq eqqunngitsumik allaaserinninnermik kinguneqarpoq

Sunaluunniit pitsaavallaaraangat, taava ilumuunngikkajuttarpoq. Ajoqersuut, BT-mi tusagassiortuusimasup AG-miittup isumaliutersuutigisariaqaraluagaa.

Skrifttypet angisuut atorlugit, Naalakkersuisut isumaqarnerarpai: ””Nunatsinneersunik pisigit” itigartikkaat”, tamanna AG-mi (sap. ak. 19) Sermitsiaq.ag-milu saqqummiunneqarpoq. Kisiannili tamanna ilumuunngilaq. Nassuiarlara:

Siullertut, aviisimut ilanngutassiami erseqqissaatigineqartutut, issuakkani, UPA2016/63-imut akissuteqaatinnit pisumik, atuffarliornikkut kukkuneq pivoq. Torersuunissaalu pillugu erseqqissaqqissavara:

””Nunatsinni tunisassianik pisiniarnissamut” inassuteqaatinnut – tunngatillugu oqaatigineqarpoq Kalaallit Nunaanni suliffeqarfiit isornartoqanngitsumik pisiniarfigineqartarnerat inuiaqatigiinnut iluaqutaalluinnartumik pinngitsoorani sunniuteqarnavianngitsoq. Unammilleqatigiinneq eqqarsaatigalugu tamatuma nassatarisinnaavaa pilersiuisut ikilinerat akigititallu qaffannerat. Aamma nunarsuaq tamakkerlugu unammilleqatigiilluarnerup iluani nunatsinni inuussutissarsiuteqarnerup ineriartortinneqarnissaa pisariaqarpoq, tassani naammassisaqarsinnaaneq, aningaasartuutinik annikillisaasinnaaneq nutaaliorsinnaanerlu pingaarutilimmik inissisimatillugit”.(matumani ataatigut titarsivunga, red.)

Oqaatsit ”pinngitsoorani” aamma ”isornartoqanngitsumik”, matumani pingaaruteqarluinnarput. Oqaatsit naammattumik nassuiarpaat, ilaatigut pisoqarsinnaasoq, sumut pisinissap qajassuunneqartariaqarneranik. Ilaatigut pisinnaavoq, inuiaqatigiit iluanni unammilleqatigiinneqanngilluinnarpat – taamaattumillu akiusut qaffasippallaarsinnaapput, pisariaqalerlunilu neqeroorutit itigartinnissaat, neqeroorutillu unammilleqatigiinnut amerlanerusunut nassiunneqartariaqarnerat.

Tamatumunnga tunngatillugu, amerlanerpaat isumaqatigissagunarpaat, pisiassap/kiffartuussinerup akisuallaarneranik, neqeroorutip itigartittariaqarsinnaanera.

Isumaqanngilluinnarporli nunami maani pisiniartarneq Naalakkersuisut annertusarusunngikkaat. Tamanna erseqqinnerusumik naqissusersinnaanngilara. Akissuteqaatillu sinnerani aamma erserpoq, ima allassimasoqarami:

”Aqutsisoqarfimmi (ASA, red.) siunnerfeqartumik suliarineqartarput neqeroortitsinermi pisiortornermilu ingerlatseriaatsinik aaqqissuussinerit, tassa kalaallit suliffeqarfiutaat unammilleqatigiinnermi peqataasinnaanerat periarfissillugu.

Kiffartuunneqarnissamut neqeroorut kalaallit suliffeqarfiutaasa tamakkiisumik suliariuminaatsippassuk toqqartuinermik tunniussisarnissamulluunniit piumasaqaatit imaluunniit najukkami pilersuisut, suleqatigisartakkat, najukkami najugaqarnissaq, piginnaasanik qaffassaaneq assigisaalluunniit pillugit isumaqatigiissuteqarnissamik piumasaqaatit aqqutigalugit peqataasarneq siuarsarneqarsinnaavoq.

Taamaalilluni kalaallit inuiaqatigiit inuussutissarsiuteqarnerullu ineriartortinneqarneri pisiassanut aalajangersimasunut immikkut ittumik piumasaqaateqarnikkut iluaquserneqarsinnaapput.” (matumani ataatigut titarsivunga, red.)

Akissuteqaammilu naggataatigut erserpoq, neqeroortitsisarnermut pisiortortarnermullu kaajallaasitassat nalilersorneqarnissaat Naalakkersuisut aallartisarniaraat.

Nioqqutissanik Kalaallit Nunaanneersunik Naalakkersuisut piserusunnginnerannik, AG-p tusagassiortuata inerniliinera paasisinnaanngilara. Oqaluttuamilli uissuumminartumik pilersitsiniarluni oqaatsikka tusagassiortumik killormut saatinneqarsimasutut isikkoqarput – neriuppungali taamaanngitsoq.

Inussiarnersumik Inuulluaqqusillunga

Randi Vestergaard Evaldsen
Aningaasaqarnermut Aatsitassanullu Naalakkersuisoq


Attavigiuk: Tusagassiinermi ataqatigiissaarisoq Martin Christiansen, mobiltelefon: 221533