Hashi pillugu oqallinnermi aggiasoqarluarpoq

Kalaallit Nunaanni hashimik atornerluineq ajornartorsiutaavoq annertooq. Innuttaasunik misissuisitsinerup kingulliup takutippaa angutini inuusuttuni 18-it 24-illu akornanni ukiulinni 2014-mi akulikitsumik (qaammammut minnerpaamik ataasiarlutik) hashimik pujortartartut. Tamanna 2005-miit qaffariarneruvoq, tassani angutit ukioqatai 20 %-iisa akulikitsumik hashimik pujortartarlutik. Ineriartorneq tamanna ernumanarpoq.

KNR-i Peqqissutsimut Naalakkersuisoqarfik suleqatigalugu 11. maj hashi pillugu unnummi oqallittoqarpoq. Innuttaasut 60-it 70-illu akornanni oqallinnermi peqataapput.

Unnummi oqalliffiusumi politiinit, kommunimit, meeqqat oqaaseqartartuanit, politikerinillu paasisimasaqarluartut sassartinneqarput.

Unnukkut oqallinnermi Mike Fly Leander-ip hashimik atornerluisuujunnaarsimanera  ajunngitsumillu inuuneqalersimanera pillugu naatsumik filmiliamik ammarneqarpoq, Taassuma kingorna ilisimasaqarluartut innuttaasunillu qanimut sullitaqarluartut, minutsini tallimani sulinerminnut atatillugu suut ulluinnarni sulinerminni unamminartut nalaattarsimasatak pillugit oqaluttuarput.

Apeqquteqarfissanngormat innuttaasunit peqataasunit sassartinneqartunut apeqqutissaaleqiffiunngilaq aammattaarlu innuttaasut hashimik atornerluineq pillugu namminneq misilittakkamiik oqaluttuarusunneq annertusimalluni.

Aqaguani oqallinneq radiokkut nanginneqarpoq tamannalu aamma innuttaasunit annertuumik soqutigineqarsimavoq.

Innuttaasunit apeqqutigineqartut pitsaasut nuna tamakkerlugu hashi akiorniarlugu iliuusissatut pilersaarutissamut ilanngunneqarumaarput.

Tamatumunnga atatillugu Peqqissutsimut Naalakkersuisup KNR oqallisigineqartumi taama pingaaruteqartigisumi suleqatigilluarsimanermut qutsavigaa minnerunngitsumillu unnummi oqalliffiusumi radiokkullu oqallinnermi peqataasut tamarmik qutsavigineqarput. Nuanneqaaq taama amerlatigisut ajornartorsiutaasup taama annertutigisup akiorniarneqarnerani akisussaaqataarusummata.

Mike Fly Leanderip atornerluisuujunnaarniarluni aqqutigisaa pillugu filmilaq Peqqik.gl-mi takuneqarsinnaavoq.

 

 

Annertunerusunik paasissutissanik piniaraanni Peqqissutsimut Sulianut Siunnersorti Julie G. F.  Kristensen oq: +299 34 66 28 imaluunniit       e-mail: jgfk@nanoq.gl-mut attavigineqarsinnaavoq.