Nunalerinermi silap pissusianut naleqqussarnissaq pillugu nassuiaat

Suliniut nutaaq nunalerinerup siunissami silap pissusianut naleqqussarneqarneranut atorneqassaaq

Nunalerineq silap pissusiata allannguutaanit ersarissumik eqqorneqartut ilagaat. Taamaattumik Naalakkersuisut Nunalerinermik Ilisimatusarfimmi ilisimasassarsiortut suleqatigalugit suliamik, inuussutissarsiuteqarnermi silap pissusiata allannguutaasa nunalerinermut unammilligassarititaanik periarfissanillu paasiniaaffiusussamik aallartitsipput.

”Silap pissusiata allannguutaasa tamatta eqqorpaatigut, kisiannili nunalerineq sunnerneqarnerpaasunut ilaavoq. Assersuutigalugu Kalaallit Nunaata kujataani ilisimasat nutaat takutippaat, siunissami piffissat panerfiusut sivisunerusalissasut. Tamatuma peqatigisaanik ukioq 2100-mi piffissaq naaffiusartoq qaammatinik marlungajannik sivitsussaaq. Tamanna unammilligassanik periarfissanillu, inuiaqatigiittut allannguutissanut akiuiniarluta piareersimaniarlutalu ilisimasariaqakkatsinnik pilersitsivoq”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Najugaqartut qanittumik oqaloqatigineqarnerat
Ilaatigut Kommune Kujallermit, Savaatillit Peqatigiit Suleqatigiissunit aamma Nunalerinermut Siunnersorteqarfimmit aallartitat qanittumi oqaloqatigalugit suliaq ingerlanneqarpoq. Suliap nunalerinermi silap pissusianut naleqqussarnissaq pillugu nassuiaammik, pissutsinik Kalaallit  Nunaata kujataani atuuttunik eqqarsaateqarfiusumik suliaqarnermik inerneqarnissaa Naalakkersuisunut pingaaruteqarpoq. Taamatuttaaq Islandip avannaani aamma Norgep avannaani misilittakkat suliniutillu qanoq iliorluni Kalaallit Nunaata kujataanut naleqqussarlugit ilanngunneqarsinnaanersut misissorneqassaaq.

”Nunalerinermi silap pissusianut nassuiaat uanga suliassaqarfinnut aamma nunalerinermi inuussutissarsiuteqarnermut sakkussaassaaq pisariaqartinneqartoq, taamaalilluta silap pissusiata allannguutaasa iluaqutissartai iluaqutigisinnaanerussagatsigit, tamatumalu peqatigisaanik sunniutaanerluttussat, soorlu piffissanit panernersuaqarfiusuni, annikillisarnissaat sulissutigisinnaassagatsigit”, Aalisarnermut, Piniarnermut Nunalerinermullu Naalakkersuisoq Karl-Kristian Kruse oqarpoq.

Pingajussaat
Nunalerinermi silap pissusianut naleqqussarnissaq pillugu nassuiaat saqqummersut pingajoraat. 2012-imi silap pissusianut naleqqussarnissaq pillugu nassuiaat siulleq, silap pissusiata allannguutaasa piniarnermik aalisarnermillu inuussutissarsiuteqarnernut sunniutissaannut tunngasoq saqqummerpoq. Siorna nassuiaatip tullia, umiarsuit angallannerinut, tassungalu ilanngullugu naleqqussaanermi annikillisaanermilu suliniutissanut periarfissanut tunngasoq saqqummerpoq.

Silap pissusianut naleqqussaanissaq pillugu nassuiaatit pingajuanni Pinngortitamut, Avatangiisinut Inatsisinillu Atuutsitsinermut Naalakkersuisoqarfik aamma Aalisarnermut, Piniarnermut Nunalerinermullu Naalakkersuisoqarfik ataqatigiissaarisuussapput.

Annertunerusumik paasisaqarusunnermi naalakkersuisup allattaa Elise Uupi Kuitse, +299 34 54 14-mut, e-mail: eukl@nanoq.gl, immikkoortortaqarfimmi pisortaagallartoq Camilla Østbirk, +299 34 60 19-mut, e-mail: caos@nanoq.gl imaluunniit immikkoortortaqarfimmi pisortaq Amalie Jessen, +299 34 53 04-mut, e-mail: amalie@nanoq.gl attaveqarfigineqassapput