Nunaateqarnerup siunissaa qulakkeerneqartariaqarpoq

Savaateqarfik - Savaateqarnerup nunaateqarnerullu siunissami ingerlaannarnissaa, immitsinnullu annersumik pilersorsinnaaleriartornerput aamma siunissami ineriartortittuarnissarput  qulakkeerneqartariaqarpoq, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.

Kalaallit Nunaanni nunalerinerup aningaasaqarniarnera pillugu nalunaarusiat marluk saqqummiunneqarput.

Nalunaarusiaq siulleq ”ESU pillugu nalunaarusiaq, nunalerineq” suliarineqarpoq, nunalerinerup aningaasatigut inissisimanera takutinniarlugu. Nalunaarusiaq suliarineqarpoq toqqammaviit eqqortut aallaavigalugit soorlu, isertitat, tunisassiornermi aningaasartuutit, akiitsoqarneq, tunisinermi kisitsisit, tapiissutinut aningaasaleriaatsinut aaqqissuussat atuuttut tunngavigalugit.

Nalunaarusiaq pineqartoq suliarineqarpoq nunalerinermi aningaasaqarnerup inissisimanera takutinniarlugu. Nalunaarusiaq  Aalisarnermut, Piniarnermut Nunalerinermullu Naalakkersuisoqarfimmi suliarineqarpoq. Nunalerineq pillugu Ataatsimiititaliarsuup isumaliutissiissutaanut inassutaanullu malitsitut nalunaarusiaq suliarineqarluni.

Nalunaarusiap aappaa, tassaasoq ”Kalaallit Nunaanni nunalerinermut siunertanut aalajangersimasunut tapiissutit”, suliarineqarpoq aningaasat tapiissutaasartut, siunissaq eqqarsaatigalugu politikkikkut anguniakkat tunngavigalugit qanoq atorneqarsinnaanerinut, tikkuussissutitut.

Nalunaarusiaq tassaavoq, pisami pineqartumi tulleriiaarinissamut sakkussatut. Nalunaarusiaq suliarineqarpoq Copenhagen Economicsikkunnit suliassamik nassuiaassiffigineqareernerminni.

- Naalakkersuisut ilisimaarilluarpaat nunalerinermik savaateqarnermillu inuussutissarsiuteqarneq aningaasatigut qanoq ajornartorsiorfiutigisoq. Taamaattumik pisariaqarpoq politikkikkut arlalitsigut aalajangersaanissaq, savaateqarnerup nunaateqarnerullu siunissami ingerlaannarnissaa, immitsinnut annerusumik  pilersuleriartornissarput, kiisalu siunissami ineriartortsitsisuarnissaq qulakkeerniarlugit, siunissamilu isumannaatsunngortinnissaa siunertaralugu, Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.

- Nunalerineq savaateqarnerlu pillugit suliat nutaat tunngavigalugit, pineqartut siunissaat ajunnginerunissaallu pillugu oqallittoqarluarnissaa Naalakkersuisut qilanaarivaat, Karl-Kristian Kruse erseqqissaavoq.

Nunalerineq pillugu ESU-mik nassuiaat

Kalaallit Nunaanni nunalerinermut siunnerfilimmik tapiissuteqarneq

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Pollas Lyberth. Mail: poly@nanoq.gl