Karl-Kristian Krusep Savalimmiuni aalisarnermut ministeri ataatsimeeqatigivaa

Nunatta Savalimmiullu iluarisimaarluinnarpaat aalisarnermut 2016-imut isumaqatigiissutigineqartoq ilaneqarmat, Aalisarnermut, Piniarnermut Nunalerinermullu Naalakkersuisoq, Karl-Kristian Kruse aamma Savalimmiuni aalisarnermut ministeri, Høgni Hoydal, ataatsimoorlutik tusagassiuutinut nalunaaruteqarlutik allapput.

Savalimmiuni aalisarnermut ministeri Høgni Hoydal Nuummut pisortatigoortumik maajip qulingiluaannit aqqarnanut tikeraarpoq. Aalisarnermut, Piniarnermut Nunalerinermullu Naalakkersuisup, Karl-Kristian Krusep, Savalimmiuni aalisarnermut ministeri ippassaq ataatsimeeqatigivaa.

Naalakkersuisut arlalinnik ullormut oqaluuserisassaqarlutik ataatsimeeqatigiipput. Oqaluuserisaasa ilaat tassaallutik nunatta Savalimmiunik aalisarnermik isumaqatigiissutaa, ineriartortsinissamut periarfissat aalisarnermillu suleqatigiissutigineqarsinnaasut.

Kalaallit aalisariutaataat Savalimmiut imartaanni saarullernanik amerlanerusunik ammassassuarnillu amerlanerulaartunik ukioq manna aalisarsinnaatitaapput. Akerlianik savalimmiormiut aalisariutaataat ningittagarsuutit Tunumi saarullinnik najorpilikkanillu amerlanerusunik aalisarsinnaalerlutik. Tamatuma saniatigut savalimmiormiut aalisariutaataat Tunumi aamma assagiarsunniarsinnaatitaalerlutik.

- Pisassiissutinik paarlaasseqatigiittarnerup takutilluinnarpaa isumaqatigiissuteqarnitsigut tamatta pissarsisaratta – ajornerusumik pisoqarani, Karl-Kristian Kruse aamma Høgni Hoydal oqarput.

Savalimmiut imartaanni aalisakkat ikerinnarsiortut ukiuni kingullerni amerlanerulersimapput, aalisakkat natermiut ikinnerulersimallutik. Akerlianik kalaallit aalisakkanik ikerinnarsiortunik aalisariutaataat amerliartuinnarput, nunatta imartaani aalisarunnaarfiup nalaani sukkulluunniit aalisarsinnaanissaminnut soqutiginnillutik.

-Aalisagartassat pillugit ukiup naalernerani isumaqatiginninniutigineqalerpata pisassanik paarlaasseqatigiittarnerup nalilersornissaanut pissamaaruteqarpugut. Nunatta Savalimmiullu annerusumik suleqatigineqalernissaanut piareersimavugut. Aamma suleqatigiissutigineqarsinnaasut allat pillugit oqaluuserineqarnissaanut piareersimalluta, Aalisarnermut, Piniarnermut Nunalerinermullu Naalakkersuisoq, Karl-Kristian Kruse aamma Savalimmiuni aalisarnermut ministeri, Høgni Hoydal oqarput.

Kalaallit Nunaat Savalimmiullu aalisarneq pillugu 1997-imiilli isumaqatigiissuteqarput, isumaqatigiissuteqartunit nuannaarutigineqarlunilu iluarisimaarneqartumik. Isumaqatigiissutit naapertorlugit Kaalaallit Nunaat Savalimmiullu pisassiissutinik paarlaaqatigiittarput, taamaasiornikkut aalisariutit ukiup ingerlanerani aalisagassaqarnerulerlutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. E-mail: jio@nanoq.gl.