Naalakkersuisut nunap iluani silap pissusianut anguniagassanik aalajangersaapput

Naalakkersuisut nunap iluani silap pissusiani anguniagassanik ersarissunik aalajangersaallutik aallartissapput. Silap pissusianut politikkimi silap pissusiani siunnerfiit anguniagaqarfiunerisa ingerlaannarnissaat qulakkeerneqassaaq.

”Naalakkersuisut Kalaallit Nunaata minguinnerulernissaa angunialeruttorpaat. Silap pissusianut politikkimik ataatsimut anguniagaqarfiusumik suliaqarniarluta aalajangernerput nuannaarutigaara”, Avatangiisinut, Pinngortitamut Inatsisinillu Atuutsitsinermut Naalakkersuisoq Mala Høy Kúko oqarpoq.

Silap pissusianut politikkimi immikkoortut akimorlugit gassinik, silap pissusianik kissatsitsisartunik aniatitsinerup killilersorneqarnissaanut anguniagassat aalajangersarneqassapput. Politikkimi nukissiuuteqarnermi, ineqarnermi, assartuussinermi, nunalerinermi aalisarnermilu, kiisalu inuussutissarsiornermi aatsitassarsiornermilu suliat eqqarsaatigalugit silap pissusia pillugu suliniutit katersorneqassapput.

”Naalakkersuisut silap pissusianut politikkimik, gassinik silappissusianik kissatsitsisartunik killilersuinerit aalajangersimasut, anguniagaqarfiusut uuttorneqarsinnaasullu inuiaqatigiit aningaasaqarnikkut ineriartornerannut pisariaqartunut naleqqussarneqarnissaannut qulakkeeriffiusunik ineriartortitsissapput”, Naalakkersuisoq Mala Høy Kúko itisiliivoq.

Nukissiuuteqarnermi Kalaallit Nunaata tamakkiisumik nukissiuutit mingutsitsinngitsut atorlugit imminut pilersulernissaa Naalakkersuisut takorluugaraat. Nukissamik pilersuinermi pingaartumik nukissiuutit ataavartut qanoq iliorluni tunngavigineqarsinnaanersut anguniakkanut suliniutissanullu aalajangersimasunut pilersaarusiorlutik Naalakkersuisut sulileruttorput. Nuissamik pilersuinermik taamatut allannguineq gassinik silaannarmik kissakkiartortitsisartunik aniatitsinerup killilersorneqarneranut annertuumik iluaqutaassaaq.

”Nukissiuuteqarnermi nuna tamakkerlugu aaqqiissutissanik mingutsitsinngitsunik pitsaasunik nassaarniarluta sulivugut”, Naalakkersuisoq Mala Høy Kúko oqarpoq

Annertunerusumik paasisaqarusunnermi naalakkersuisup allattaa Elise Uupi Kuitse, telefon 34 54 14-imut imaluunniit immikkoortortaqarfimmi pisortaagallartoq Camilla Østbirk, telefon 34 60 19-imut attaveqarfigineqassapput.